Облыс әкімдігінің мәжіліс залында ҚР мәслихаттарының құрылғанына 25 жыл толуына арналған салтанатты жиын өтіп, өңірдің өркендеуіне үлес қосқан азаматтар марапатталды. Аудан, қала әкімдері, аудандық, қалалық мәслихаттардың хатшылары, «Nur Otan» партиясы облыстық филиалының басшылығы, облыстық мәслихат депутаттары, облыстық басқарма, департаменттердің басшылары, бұқаралық ақпарат құралдарының өкілдері қатысқан салтанатты жиынды облыстық мәслихаттың хатшысы Сұлтан Дүйсембінов ашып, жүргізіп отырды.
Айтулы датаға орай көпшілікті құттықтау үшін мінберге шыққан облыс әкімі Амандық БАТАЛОВ Жетісу жерінің жетістіктеріне тоқталып, тәуелсіздік алған тоқсаныншы жылдардағы қиындық пен бүгінгі күннің көрсеткішін салыстырды. Өз сөзін:
– Құрметті депутаттар, құрметті жиынға қатысушылар! Биыл елімізде мәслихаттардың құрылғанына 25 жыл толып отыр. Осы күнге орай баршаңызды шын жүректен құттықтаймын! Ширек ғасыр ішінде мәслихат өзінің қоғамдағы рөлін айқындап, өз жолын қалыптастырды, – деп бастаған өңір жетекшісі мәслихаттардың қоғам дамуы кезінде атқарған міндеті мен жауапкершілігі жайында айтып өтті. – Мәслихат қашанда халықтың үнін жеткізетін бұқара мен биліктің арасындағы алтын көпір. Өкілетті орган ел сеніміне ие болып, сайлаушылардың мүддесіне сай жұмыс істеуде. Осы ширек ғасыр ішінде облыстық мәслихатты Ахет Бақтыбаев, Қуаныш Құрмашев, Едіген Жүнісбеков, Ардақ Сыдық, Серікжан Бескемпіров, Ермек Келемсейіт, Серік Мұқанов сынды тәжірибесі мол, істің ретін жетік білетін мамандар басқарды. Бүгінгі күні Сұлтан Мырзабекұлы Дүйсембінов басшылық етіп отырған депутаттық корпус та өзіне артылған міндетті абыроймен атқарып отыр. Жуырда мәслихаттардың құрылғанына 25 жыл толуына орай Нұр-Сұлтан қаласында өткен республикалық конференцияға біздің облыстан да делегаттар қатысып, Сұлтан Мырзабекұлы өңір депутаттарының атқарған қызметі туралы кеңінен әңгімеледі. Қазірде мәслихат депутаттары құрамында өмірден түйгені көп, еңбекте тәжірибесі мол, елге беделді азаматтар жетерлік. Күні кеше ғана «Nur Otan» партиясының өңірлік филиалдары- ның басшыларымен өткізген кездесуінде Елбасы жергілікті мәслихаттардағы депутаттық фракциялардың партиялық жауаптылығын күшейту қажеттігін атап өтті. Сол сияқты барлық деңгейдегі мәслихаттардың жұмысын жақсартып, мәртебесін нығайту жөнінде де тапсырма берді. Бүгінгі депутаттық корпустың Елбасының тапсырмасын лайықты орындауға барлық мүмкіндігі бар және оған әрбір депутат белсене атсалысады деп ойлаймын.
Амандық Баталовтың айтуынша, биыл экономиканың барлық негізгі салаларында өсім бар. Әсіресе, өнеркәсіп өндірісі 5,5%-ға ұлғайып, жыл соңында өнім көлемі 1 триллион теңгеге жетсе, ауылшаруашылығында жалпы өнім 800 миллиард теңгені құрап, 103,2% өсім қамтамасыз етілді. Облыс экономикасына 522 миллиард теңге инвестиция тартылып, 46 мың жаңа жұмыс орнының ашылуы арқылы республикадағы ең жоғары көрсеткішке қол жеткізіліп отыр.
Келесі кезекте жарыссөзге шыққан облыстық мәслихаттың депутаты Найля Үмбетова мен мәслихаттың бірнеше шақырылымының депутаты, Ескелді ауданының Құрметті азаматы Қалабек Тастанбеков мәслихаттардың 25 жылдығына орай көпшілікті құттықтап, жүрекжарды тілектерін жеткізді.
Салтанатты жиын соңында Алматы облысының жергілікті өзін-өзі басқару саласының дамуына елеулі үлес қосқан азаматтар ҚР Президентінің Алғыс хатымен, ҚР Парламенті Сенаты Төрағасының Құрмет грамотасымен және Алғыс хатымен, «Nur Otan» партиясының «Белсенді қызметі үшін» төсбелгісімен, Қазақстан халқы Ассамблеясының Алғыс хатымен, ҚР Білім және ғылым министрлігінің Құрмет грамотасымен, «Қазақстан мәслихаттарына 25 жыл» мерекелік медалімен, «Қазақстан мәслихаттарының республикалық қоғамдық бірлестігінің» «Құрметті депутат» төсбелгісімен, облыстық мәслихаттың Құрмет грамотасымен, облыс әкімінің Алғыс хатымен және Құрмет грамотасымен марапатталды. Марапатталушылардың қатарында облыстық «Жетісу» газетінің бас редакторы Әміре Әрін, «Өлке тынысы» ЖШС-нің директоры Мейрам Жанадилов «Қазақстан мәслихаттарына 25 жыл» мерекелік медалін кеуделеріне қадады. Әріптестерімізді мерейлі марапаттарымен құттықтаймыз.
Мәди АЛЖАНБАЙ
