Бұндай пікірді жаңадан сайланған Мәжіліс депутаты Самат Нұртаза өзінің әлеуметтік желідегі парақшасында жазды, деп хабарлайды 7-su.kz желілік басылымы.
Су жаңа депутат жазбасында халық үшін қызмет етуге құдай мүмкіндік бергенін айтады.
— Құдай депутатқа Халық үшін қызмет етуге мүмкіндік береді. Егер депутат Халықтың мұң-мұқтажын билікке жеткізбесе, ол депутат Халықтың алдында қарабет болары хақ. Егер депутат Халықтың сөзін билікке жеткізіп, Халықтың мүддесімен жүрсе, ол депутаттың жүзі жарқын болатыны хақ, — дейді ол
Бұдан әрі ол осы елде туып-өскен балаларының ертең «әкең суайт» демеуі үшін жұмыс жасайтынын жеткізген.
— Тағдырдың берген мүмкіндігін Халық үшін пайдалануға өзім де мүдделімін. Себебі балаларым осы елде өсіп жатыр, туыстарым, ағайын-туыс, жолдас-жора осы Қазақстан Республикасында өмір сүреді. Депутаттық лауазымға масайып, ертең балаларым “Әкең өтірікші”, “Әкең суайыт” деген сөз естігеннен сақтасын. Лауазым да, тіпті өмір де — қысқа. Тарих үшін еңбек ету керек. Ажал жетіп, өліп кеткенде “Жақсы кісі еді” деген сөздер көп болу үшін тырысамын. Айтарым осы. Қалғаны уақыт еншісінде, — деп аяқтаған өз жазбасын.
Фото: пікір авторы парақшасынан
«ЖЕТІСУ» АҚПАРАТ
