Биылғы көктемнің толассыз жаңбырынан өріс пен егіндік шығымы жақсы. Алайда кейбір берекелі жылдары шаруалар өсімдікке қауіпті жәндіктердің кесірінен шығынға ұшырайтыны белгілі. Мұның алдын алу шаралары Жамбыл ауданында жоспарлы жүргізіледі.
Зиянды жәндіктің бірі – шегіртке. Көзге елеусіз болғанымен, егінге, мал өрісіне қаптаса, тып-типыл етеді. Республикалық фитосанитарлық диагностика және болжамдау әдістемелік орталығының Жамбыл аудандық филиалы оның қаупі кейбір аймақта пайда болғанын анықтады. Мекеменің зерттеу қорытындысына сәйкес, Ақтерек ауылында 1380 гектар, Сарытауқұм ауылында 500 гектар жерде Саяқ шегіртке көбейгені белгілі болып, оған қарсы дәрі шашу жұмыстары жүргізілді. Аталған шара аудан әкімінің арнайы қаулысымен бекітіліп, жоспар бойынша орындалды. Бұл туралы тиісті ауылдардың тұрғындарына және шаруа қожалық иелеріне алдын ала хабарланып, түсіндіру жұмыстары жүргізілген.
«Шегірткелердің ішінде аса қауіптісі – италиялық, азиялық және жергілікті Саяқ түрі. Біздің ауданда жергілікті Саяқ шегіртке көп тарайды. Олар бір шаршы метр жерге 3-5-тен келсе қалыпты жағдай, ал 8-10 шегірткеден асып кетсе, аса қауіпті болып саналады. Зиянкес көп шоғырланған жерге дұрыстап дәрі шашпаса сан соқтырады. Дәрілеу жұмыстары арнайы ұшақпен жүргізілді. Дәрі шашылған аумақта 15 күнге дейін мал бағуға, шөп шабуға болмайтынын ескерттік», — дейді аудандық ауыл шаруашылығы және жер қатынастары бөлімінің бас маманы Қайрат Тойшыбеков.
Серік САТЫБАЛДИЕВ,
Жамбыл ауданы
