«Туған жерім – тұғырым» жобасы аясында он күнге созылған Жамбыл Жабаевтың 175 жылдығы мен ақиық ақын Мұқағали Мақатаевтың 90 жылдығына арналған кәсіпқой суретшілердің халықаралық пленэрі аяқталып, аудандық Мәдениет үйінде қорытынды жиыны өтті. Бірнеше елдің кәсіби суретшілерінің басын қосып, шабытын шақырған айтулы шара облыс әкімінің тікелей қолдауымен ұйымдастырылды.
Қазақ поэзиясының қос алыбына арналған пленэр Райымбек ауданынан бастау алып, Жамбыл жерінде мәреге жетті. Оған Қырғызстан, Өзбекстан, Түркия, Қытай және өз елімізден Алматы, Нұр-Сұлтан қалалары мен облыстардан барлығы жиырма суретші қатысты. Пленэр дегеніміз белгілі бір өңірге бірнеше суретші топтасып шығып, сол аймақтың табиғатын қарап салу болып табылады. Табиғатты бейнелегенде суретшілер композициялық шешімге, ауа кеңістігі мен сызықтық перспективаға және жыл мезгілінің бояуларына ерекше көңіл бөледі. Қылқалам шеберлері бірінші күні Хантәңірінің баурайын ақ қағазға бедерледі. Одан кейін аптадан астам Жамбыл мекен еткен киелі жерді қылқаламмен кестеледі. Сапарлап келген сәтте суретшілерді аудан әкімі Нұрлан Ертас арнайы қабылдап, бейнелеу өнерінде тың туындылар әкелулеріне тілектестік білдірген болатын. Ақындар мен батырлар елі қонақжайлық танытып, табиғат аясында шығармашылыққа еркін бойлауға бар жағдайын жасады. Жамбыл ауданында олар Суықтөбе, Қарғалы, Беріктас, Қоңыртөбе тауларында айналаға тамсана көз суарып, пейзаж жанрында көлемді екі суреттен салды.
Сол дүниелердің барлығы қорытынды жиында ұйымдастырылған көрмеге қойылып, 40-тан астам бояуы кеппеген туынды алғашқы көрермен назарына ұсынылды. Оған қоса пленэр шарты бойынша әр суретші Жамбыл, Мұқағали тақырыбына ойдан салған дайын екі картинасын да көрмеге өткізді. Осылайша пленэр барысында 20 суретшінің қолынан шыққан 80 картина өмірге келді. Көрмені тамашалау барысында мамандар табиғат жанры бойынша ерекше шыққан туынды ретінде өзбекстандық Дилорам Мамедованың, Қазақстан Суретшілер одағының төрағасы Өмірбек Жұбаниязовтың, алматылық Марат Әбдреевтің өнерін жоғары бағалады. Жамбылдық Марат Төтеевтің Марат Әбдреевпен бірігіп салған Жамбылдың көлемді портретіне көрермен жоғары баға берді. Осы 80 картина түгелдей облыстық көркемсурет галереясы мен музейлерге сыйға тартылды.
Салтанатты жиында құттықтау сөз алған облыстық мәдениет, архивтер және құжаттама басқармасының басшысы Марлен Көлбаев барлық суретшілерге облыс әкімдігі атынан Алғыс хат және 300 мың теңгенің сертификатын тапсырды. Халықаралық «ТҮРКСОЙ» ұйымының бөлім басшысы Санжар Мүләзімоғлы Мехмет ыстық ілтипатын білдіріп, суретшілерге тиісті марапатын табыс етті. Ақындар мен батырлар елінің өнер иелеріне деген сый-құрметін аудан әкімінің орынбасары Ақниет Туматаев жеткізді. Жиын соңы аудан көркемөнерпаздарының концертімен жалғасты.
Жетісудың алып тұлғалы ақындарын ардақтап, портреттерін байытып, оларды туған өлкесімен бірге әлем елдеріне насихаттауды мақсат еткен шараға ұйытқы бола білген облыстық суретшілер одағының төрағасы Ермұхан Жүнісхан мен облыстық көркемсурет галереясының директоры Қайрат Қаблисановқа суретшілер ризашылығын білдіріп тарқасты. Сондай-ақ пленэрге Жамбыл ауданынан қатысып, әріптестеріне аудан табиғатының тамаша жерлерін көрсетуде жолбасшы болған ҚР Суретшілер одағының мүшелері Әуелбек Ысқақов пен Марат Төтеевтің де еңбегі елеулі. Он күндік шара Мұқағали, Сүйінбай, Жамбыл, Үмбетәлі музейлерін аралап, Ұзынағашта «Сүйінбай» театры сахналаған «Екі Жамбыл, екі әлем» спектаклін тамашалаумен де қызықты өтті. Тағы бір айта кетерлігі, пленэр аясында жергілікті суретші Ахат Манапов өзінің «Туған жер бояулары» атты жеке сурет көрмесін Үмбетәлі Кәрібаев музейінде өткізіп, оны пленэршілердің тамашалағаны.
Серік САТЫБАЛДИЕВ
