Талдықорған қаласының №14 орта мектеп-гимназиясында «Еңбек ерлікке бастайды» тақырыбында тәрбиелік-танымдық шара өтті. Оған облыстық «Жетісу» газетінің бас редакторы, Халықаралық «Алаш» әдеби сыйлығының иегері, Бүкіләлемдік Шыңғысхан академиясының академигі, Қазақстан Жазушылар және Журналистер одағының мүшесі Әміре Әрін қатысты.
Кеш қонағы оқушыларға қызықты етіп, өзінің балалық шағын, өмір жолын әңгімелеп берді. Кішкентай күнінен қайтпас-қайсар, талабы таудай болып өскен ол шумақтап өлең жазып жүріпті. Ауылға келген Зейнетолла аға оның өлеңін тыңдап: «Осы сенен ақын, журналист шығады», – деп риза болып, батасын берген екен. Бала жүрекке түскен сәулелі шоқ алаулаған отқа айналып, жігерлендіре түседі. Сөйтіп ол арман қуып Алматыға барып, өмірдің кейбір ауыртпалықтарымен күресе жүріп, алға қойған мақсатына жетеді. Үнемі ізденісте болып, шығармашылығын шыңдап, журналистика саласында көптеген биікке көтеріледі. Сол кезде Әміренің алға қадам басуына бір ғана адам сөзімен қанат байласа, бүгін ол мыңдаған жүрекке от жағатын, ыстық арман сыйлай алатын айбоз ақынға айналды. Оған кеште сонау ата-бабамыздың тарихынан бастап, бүгінгі күнге дейінгі аралықты қамтып алаулата айтқан әңгімелері дәлел. Осылайша «жанам деген жүрекке от беретін, ұйықтап жатқан адамның өзін түртіп оятатын» ақынның сырлы да жалынды сөздерін естіп біз де шабыттандық.
Кеште ақынның өлең-жырлары да оқылып, әндер шырқалды. Осындай тамаша кездесуді ұйымдастырған мектеп басшысы Жанар Сансызбаеваға, ұстаздарға мың алғыс! Асқар таудай ел ағасының қасында тұрып суретке түсу бақыты маған да бұйырды. Білмеймін, азаматымыздың шарапаты тиді ме, жыр шумақтары өзінен-өзі төгіле берді, төгіле берді.
Армысыз, қайсар жігіт,
Әміре бауыр,
Пір тұтқан өзіңізді мына қауым.
Әр сөзіңіз ұрпаққа үлгі болып,
Өрге өрледі өрісі, шығар тауы!
Қайсарлық пен қабілет қатар кепті,
Бір ауыз сөз жүрекке нұрын септі.
Талпындың «мақсатыма жетемін»
деп,
Мойымай білім алдың, терді төктің.
Парасатты шешен ұл жаны
жарқын,
Түсінген бір көргеннен адам парқын.
Көргенді де білімді, ақберен ұл,
Жалғап жүр ақ қаламмен баба
салтын.
Нұр септің жүз мың шәкірт
сезіміне,
Леп бердің оқушының төзіміне.
Өзіңдей мың Әміре шығары анық,
Апаңның ойы нық қой, сөзі, міне!
Еңбекпен ер атанған Әміре аға,
Болмысың мен ұстаным етті дана!
Қаламмен шындықты көп
шарықтатқан,
Жауһар еттің еліңнің ісін дара.
Желбіреген туыңыз болып халық,
Жеттіңіз мақсатыңа зерде салып.
Талай биік-белесті бағындырдың,
Өзің нәзік болсаң да жүрек алып!
Тер төккеннен шығып жүр
ер боп атың,
Жақсы көрер шәкірттер, абзал
халқың.
Шыңдалып шыңға шықсын
оң боп ісің,
Шартарапқа жайылсын
Әміре атың!
Нұртай ШЫНҚОЖАНОВА,
Талдықорған қалалық
ардагерлер ұйымының
«Ғарышкер» шағынауданы филиалының төрайымы,
қарт ұстаз
