Жетісу облысының әкімі Бейбіт Исабаевтың тұрғындарды жеке мәселелері бойынша қабылдауына оншақты адам келді. Мұнда тұрғындар жер, тұрғын үй, денсаулық мәселелері бойынша өтініш-тілектерін жеткізді.
ІІІ топтағы мүгедек Ерлан Шәліпбаев тұрғылықты жерінің жоқтығын айтты. Ол Талдықорған қаласында үй кезегінде тіркелген. Бірақ, кезегі жеткенше уақытша тұрғанға жатын орын болса деді. Сонымен қатар, мүгедектігін ІІІ топтан ІІ топқа ауыстырса деген өтінішін жеткізді. Себебі, кей кездері оның қол-аяғы тартылып, есінен танып қалатын көрінеді. Облыс әкімі Ерланның сөзін мұқият тыңдап, әлеуметтік салаға жауапты мамандарға мүгедектік мәселесін қайта қарап, уақытша тұратын орын тауып беру жөнінде де тапсырма берді.
Қоғамдық қабылдауға кіргендердің ішінде елдің жайын қозғағандар да болды. Соның бірі – облыстық грэпплинг федерациясының президенті Айдос Усабаев. Ол шаһардан күрес залын ашсам деген ойымен бөлісті. Жастарды күрес спортына баулитын ғимаратты тұрғызуға қаладан 20-30 сотық жер сұрады. Жер беру мәселесі конкурстық негізде берілетінін айтқан Бейбіт Өксікбайұлы өрендерді салауатты өмірге бейімдейтін мұндай іс-шараға қолдан келгенше көмек көрсетілетінін жеткізді. Сонымен, спорттық ғимарат салынатын жер алдағы уақытта шешімін тауып қалар. Қоғамдық қабылдауға келгендердің мәселесі жан-жақты қаралып, шешілу жайын сол жерде отырған жауапты басшыларға тапсырды.
Гүлжан ТҰРСЫН
