Таутүргеннің асқар тауларынан қуат, мөлдір бұлағынан нәр алған Әбілсейіт пен Мейрамгүлдің құрағы, кенже баласы Тілек Жұмаділ мектеп табалдырығын аттағалы спортқа жаны құмар болып өсті.
Жаттықтырушысы ха-лықаралық дәрежедегі спорт шебері Бекмұрат Мақсұтовтың қарамағында Тілек мейбукан годзю-рю каратэмен жаттыққалы екі жылдың жүзі болды. Тілек өте өжет, алдына қойған мақсатына жетпей қоймайтын, спортты сүйетін бала.
Каратэ – бұл жай спорт емес, философия мен өнер. Мейбукан годзю-рю каратэ -до облыста жаңадан жанданып келе жатқан спорттың бір түрі.
Алматы қаласының дене шынықтыру және спорт басқармасының ұйымдастыруымен өткізілген Мейбукан годзю-рю каратэ-до жарысына төрт жүзден аса спортшы қатысты. Осы шығыс жекпе-жегіне Таутүрген ауылының, Таутүрген орталау мектебінің мақтанышы Жұмаділ Тілек те өз үлесін қосып, он төрт-он бес жас аралығында I орынды жеңіп алды. Алматы қаласы дене шынықтыру және спорт басқармасының дипломымен марапатталып, каратэ мейбукан годзю-рю «Қазақстан Республикасының спорт шеберіне үміткері» атағы берілді. Шығыс жекпе-жегінің жанкүйері, спортты қолдаушы Мақсат Нюков пен жаттықтырушы Бекмұрат Мақсұтов шығыс жекпе-жегінің ерекшелігіне тоқталып, спортпен айналысуға қазіргі заманда барлық жағдай бар екендігін айтып, куәлігін табыс етті.
Г. СӘРСЕНҚЫЗЫ,
Таутүрген орталау мектебінің тәрбие ісі жөніндегі орынбасары
