Шағын және орта бизнестің дамуы – ел экономикасының өркендеу кепілі. Осы орайда нәтижелі жұмыспен қамтудың және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасы аясында жасалынып жатқан жұмыстар өз жемісін беруде. Аталған бағдарламаның көмегімен қайтарымсыз грантқа ие болып, жылдам тағам дайындайтын орын ашқан Нұрлыбек Ыдырыстың қадамы осыған дәлел бола алады.
Қаскелең қаласындағы Қ. Сәтбаев атындағы орта мектепте білім алып, Алматы индустриалды колледжінде «машина жасау» мамандығын меңгерген ол алғаш еңбек жолын ұстаздықтан бастаған. Алайда, бесінші санаттағы аспаз болып еңбек ететін ағасы Нұрпейістің ықпалымен ас әзірлеу ісіне бірте-бірте бой алдырып, «Zheka’s Doner Hause», «Pinta Bar Grill», «ШашлыкоFF Bar-Grill» сияқты еліміздегі ірі тамақтандыру желілерінде аспаз мамандығының тереңіне бойлап, тәжірибе жинақтайды.
«Генерал болуды армандамайтын солдат – солдат емес!..» дегендей, енді Нұрлыбек өзінің жеке кәсібін ашуды ойға алған болатын. Өзі жақсы білетін тамақтандыру саласында бағын сынап көруге бел буған ол «Атамекен» кәсіпкерлер палатасының Қарасай аудандық филиалына келіп, алдымен іскерлік әлемінің қыр-сырына қанығу үшін 21 күндік онлайн курстан өткені бар. Осылайша, нәтижелі жұмыспен қамтудың және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасы бойынша бизнес-жобасын қорғап, 556 мың теңге қайтарымсыз грантқа ие болған. Ол ақшаға пицца пісіруге арналған пеш, мұздатқыш, тоңазытқыш сияқты қажетті жабдықтар сатып алады.
«Жаяудың шаңы шықпас, жалғыздың үні шықпас…» дегендей, бір өзіне үлкен жобаны жүргізіп кету қиындық тудыратынын білген Нұрлыбек осы тұста мектепте бірге оқып, біраз уақыттан бері Қаскелеңдегі «Japonica» барында сушист болып еңбек ететін досы Ахмет-Али Уразалыевті көмекке шақырады. Осылайша «01Sushi kz» деп аталатын екеуінің бірлескен тез дайындалатын тағамдар асханасы өмірге келген болатын.
Қандай да бір бизнес ашпас бұрын өндірілген өнімнің таралуын, тұтынушылар қауымын зерттеп алу – бұлжымайтын заңдылық. Осы мәселені зерттей келе жас кәсіпкерлердің таңдауы Алматы-Бішкек күре жолының бойында орналасқан, халықтың ең көп шоғырланған жері – «Асыл арман» тұрғын үй кешеніне тоқтаған. Заманауи маркетингті пайдалана отырып түрлі акция ұйымдастырылып, жергілікті тұрғындар үшін тиімді тәсілдер де оңтайлы пайдаланылуда. Осылайша, 2020 жылдың тамыз айында жұмыс істей бастаған кәсіпорын бүгіндері келушілер мен тапсырыс берушілердің сүйікті орны мен сенімді серігіне айналған. Бұл жерде Қазақстан Мұсылмандары діни басқармасында (КМДБ) рұқсат етілген тағамдарды дайындауға басты басымдық берілетінін де айта кету керек.
Заман талабына сай жұмыс істеуді жолға қойған жігіттер «Instagram» әлеуметтік желісі мен «2ГИС» қосымшасы арқылы тағамдарын насихаттап, ауданның шалғай жатқан ауылдарына қызмет көрсетуді жолға қойған. Тіпті, Алматы қаласынан да «01Sushi kz» өнімдеріне деген қызығушылық байқалып отыр. Ал, іргедегі Іргелі, Кемертоған, Райымбек ауылдарының тұрғындары олардың дәмді фаст-фудтарына жиі тапсырыс береді.
Бүгіндері шағын ұжымның мүшелері – Нұрлыбек пен Ахмет-Али дәмді әрі тез дайындалатын тағамдарды әзірлеумен айналысса, Мирас тапсырыс берушілерге жеткізіп беруді өз мойнына алған. Жас кәсіпкерлер алдағы уақытта өндірістерін кеңейтіп, ауданның өзге де аймақтарынан осындай орындар ашуды жоспарлап отыр.
Қуат ҚАЙРАНБАЕВА
