Күнтізбеде ерекше жазылған «желтоқсан» дегенде бәріміздің есімізге ұлтымыздың ұлы мерекесі түсетіні анық. Бірақ, дәл осы айтулы күні Қайрат, Ләззат, Сабира, Ербол сынды қаншама аға-әпкелеріміз келер ұрпақ өзгеге тәуелді болмай, азаттықтың ақ таңын атырса екен деп бастарын қатерге тігіп, билікке бейбіт түрде ішкі жанайқайы мен көкейдегі сұрақтарын, намыстарын оятқан наразылықтарын жария етіп, алаңға шыққандағы ерен ерліктерін ұмытпағанымыз жөн.
Желтоқсан көтерілісі қазақ халқын дүр сілкіндіріп қана қоймай, намысын оятып, рухын асқақтатқаны ақиқат. Себебі, қазақ халқының басшысы ретінде елімізге бұрын-соңды аяқ басып көрмеген өзге ұлт өкілін тағайындағанда, жастары небәрі 18-19-дағы қазақ жастары ұлт болашағы үшін алаңға шықты. Сол күні жігіттермен бірге шыққан нәзік жанды қаракөз қыздардың да ерен ерлігі ел есінде.
Тәуелсіздікті талап етіп, ұлт намысын жоқтап, көкейдегісін билікке ашық айтқаны үшін ғана қазақ жастары темір таяққа жығылып, қыздарымыз шаштарынан сүйретіліп, тепкінің астында қалып, қақаған аязда тастай суық сумен атқыланған, өрт сөндіргіш көліктердің табан жолында тапталып, улы газға тұншықтырылған, итке таланған. Аяусыздықпен ары зорланған қазақ қыздары мен намысы қорланған қазақ жігіттері осы көтерілістен соң жаппай қудалауға түсті. Алаңда орын алған дәл осы оқиғалар біздің де балаң жүрегімізді қан жылатып, көңілімізді қынжылтады.
Сол күні алаңға шыққандардың біз тек бірнешеуін ғана білеміз, ал ол жерге сан мыңдаған қазақ жастары шықты. Солардың арасында менің ата-анам Әділхан Қыстаубаев пен Гүлмира Әлімбаева да бар. Анам мен әкемді мен бүгінгінің нағыз батырлары деп білемін және ерлік істерін мақтан тұтамын. Сонымен қатар, менің Гүлнар Майқынова, Жанат Қоңырбаев сынды аяулы да ардақты ұстаздарым сол көтерілісте бас көтерген болатын.
Біз, жас ұрпақ, бұл оқиғаны көзімізбен көрмесек те осы аға-апайларымыздың басынан өткен қиындықты жүрегімізбен сезіне аламыз десем қате айтқаным емес. Ауыл жастары, мектеп оқушылары бұл кісілерді ерекше құрметтейді. Жыл сайын мектебіміз айтулы мерекеде жылы жүздесулер мен көңіл толқытатын кездесулер өткізеді.
Тоқсан ауыз сөздің тобықтай түйінін айтсам, қазіргі жас ұрпақ осы ерлікті, осы есімдерді жылына бір рет қана еске алып қоймай, мәңгі жадында сақтаса екен деймін. Біз Тәуелсіздік жолында бастарын қатерге тігіп, құрбан болғандарды ешқашан ұмытпауымыз керек. Ал біздің артымыздан ерген іні-қарындастарыма айтарым, Тәуелсіздіктің ақ таңының қадіріне жетіп, бағалай білейік!
Мақпал ӘДІЛХАНҚЫЗЫ,
Малгеждар Әубәкіров атындағы
орта мектептің 11-сынып оқушысы
Екпінді ауылы,
Алакөл ауданы
