Түп шежіресі ежелгі түркіден бастау алатын «мың өліп, мың тірілген» қазақ халқы бағзы заманнан бері қабырғалы қалпын, салиқалы салтын сақтап қалғаны – еркіндік сүйгіш жігерінің, асқақ рухының арқасы. Сонау сақтардан басталып, ғұн, қаңлы, қыпшақ, Ақорда мен Қазақ хандығының жалғасы болған – бүгінгі тәуелсіз Қазақстан мемлекеті.
Тәуелсіздік үшін ақ білектің күшімен, ақ найзаның ұшымен елін қорғаған бабалар рухынан қуат алған ызғарлы Желтоқсан оқиғасы қазақ халқының қасіреті де, қасиеті де жетерлік тарихына айналды. Желтоқсан оқиғасы қаншама ызғарлы естілсе де жанымызға нұр септі. Желтоқсан жаңғырығы бізге тәуелсіздіктің ақ таңын әкелді.
Қазақ халқының ғасырлар бойы аңсаған арманы «Қазақстан Республикасының мемлекеттік тәуелсіздігі туралы» конституциялық заңы қабылданған сол бір тарихи жылы, 1991 жылдың 16 желтоқсан күні жүзеге асты. Дүниеге жаңа мемлекет Тәуелсіз Қазақстан келді.
Облыстық жұмыспен қамтуды үйлестіру және әлеуметтік бағдарламалар басқармасы мемлекеттік мекемесі «Қоғалы арнаулы әлеуметтік қызмет көрсету орталығы» коммуналдық мемлекеттік мекемесінде Қазақстан Республикасының 30 жылдығына арналған он күндік «Тәуелсіздік – мәңгілік» атты тақырып аясында іс-шаралар өтті. Мекеме мамандары карантин талаптарын сақтай отырып, жоспарға сай жұмыстарын атқарды. Алғашқы болып орталығымыздың кітапханашысы А. Рахымжанованың «Қазақстан Тәуелсіздігінің 30 жыл тарихы» атты «дөңгелек үстел» өткізілді.
Біздің Отанымыздың мақтантұтар мемлекеттік рәміздері бар. Өйткені Қазақстан Туымен тұғырлы, Елтаңбасымен еңселі, Әнұранымен айбатты. Елін, жерін сүю мен Отанға адалдықтың бір белгісі мемлекеттік рәмізімізді қадір тұту болып табылады. Осыған орай «Мемлекеттік рәміздер – ұлттық мақтанышымыз» атты дәріс сабағын орталығымыздың әлеуметтік жұмыс жөніндегі маманы И. Қайранова қызметкерлерге, қызмет алушыларға оқып кеңінен мағлұмат берді.
Кез келген зайырлы елдің даму бағыттарын белгілейтін басты құжаты – Ата заңы. Қазақстанның көпұлтты халқы өзінің егемендік құқығын барша әлемге паш етіп, көптеген елдермен терезесі тең, іргетасы мықты демократиялық жолмен дамып келе жатқан мемлекет екендігін танытты. Сөйтіп, 1995 жылдың 30 тамызында Қазақстан Республикасының Ата заңы өмірге келді. Осыған орай орталығымыздың заңгері Е. Рахтаев «Ата заңым – айбарым» тақырыбында дайындаған баяндамасын оқыды.
Іс-шара Отанға деген сүйіспеншілікке, ұлттық қадір-қасиетке баулып, патриотизмді қалыптастыру мақсатында орталығымыздың дене шынықтыру маманы К. Сикумовтың ұйымдастыруымен «Алға, Қазақстан» спорттық жарысымен жалғасты. Одан бөлек, орталығымыздың психолог мамандары Ж. Бақтиярованың «Тәуелсіздік төрінде», А. Өмірханованың «Тәуелсіздік ата-бабам аңсаған» атты тәрбие сағаттармен жалғасты. Сондай-ақ, «Тәуелсіздік – ел тірегі» тақырыбында дефектолог Ж. Баймолдаева мен әлеуметтік жұмыс жөніндегі маманы Т. Құлсейітов «Тәуелсіздік – баға жетпес байлық» атты тәрбие сағаттарын ұйымдастырды.
Өз кезегінде мәдени ұйымдастырушы Б. Қалыбаева мен музыка жетекшісі Е. Бримбетова мерекелік концерттік бағдарлама ұсынды. Шығармашылық жұмыстарды, қазақ ұлттық мәдениетін дамыту барысында еңбек нұсқаушылары Ж. Балабаевтың «Қолөнер – зор өнер», Ж. Жантілеуованың «Тәуелсіздіктің 30 жылдығына арнап ашықхаттар жасау», А. Айдосовтың «Шебердің қолы ортақ» тақырыптарында ашық сабақтары өткізілді.
Он күнге созылған шара дене шынықтыру нұсқаушысы Е. Дюзгенбековтың «Біз біргеміз» мерекелік спорттық шарасымен салтанатты түрде жабылды. Соңында іс-шараға белсене қатысқан қызмет алушылар өз деңгейінде мақтау қағаздармен марапатталды. Қызмет алушылар өткізілген іс-шаралардан Отанға деген сүйіспеншіліктері артып, орталықтың ұжымына ризашылықтарын білдірді.
Сәния ЖАПАШЕВА,
Қоғалы арнаулы әлеуметтік қызмет көрсету орталығы директорының әлеуметтік жұмыс жөніндегі орынбасары
Кербұлақ ауданы
