Биыл қастерлі тәуелсіздігімізге 30 жыл толады. Осыған байланысты ел Президенті Қасым-Жомарт Тоқаев «Тәуелсіздік бәрінен қымбат» атты мақаласында: «Отыз жылда біз қандай жетістікке жеттік? Келер ұрпаққа қандай елді аманаттаймыз? Мемлекеттігімізді нығайта түсу үшін тағы не істейміз?», – деген сауалдар толғандыратынын айтқан болатын. «Осы тұрғыдан алғанда, бұл – арман-мақсаттарымызды тоғыстырып, болашаққа тың серпінмен қадам басу үшін өткенге тағы бір мәрте оралатын, жетістіктеріміз бен кемшіліктерімізді ой елегінен өткізетін маңызды мезет» екендігін ерекше атады.
Біздің облыс республикамыздағы ең көлемді, ең үлкен облыстардың бірі. Оның ішінде облыстың соңғы жылдары, әсіресе, кейінгі онжылдықта даму жолында үлкен табыстарға жетіп келе жатқанын зор мақтанышпен айтамыз. Бұл орайда облыс тұрғындарының үлесі зор. Оны да атап өткеніміз дұрыс деп есептеймін. Жалпы, Алматы облысы 2001 жылы 15 сәуірдегі Президент Жарлығымен бұрынғы Талдықорған облысының орталығы болған қалаға көшті. «Содан бері қандай өзгерістер болды?» деген мәселенің туындауы заңды. Осы мәселеде облыстың тұрғыны және сол жылдары қызмет істеген адам ретінде өз пікірімді білдіргім келеді. 20 жыл оңай уақыт емес. Осы орайда, Талдықорғанның тарихына көз жүгіртер болсақ, бұрынғы сақ, түркі қағанаты дәуірінде салынған, сол дәуірдегі қазақ ауылдарының негізінде қаланған деген тарихи деректер бар. Оны біз Мұхаметжан Тынышпаевтың еңбектерінен жақсы білеміз. Бұл жөнінде біздің бұрынғы қазақ мемлекеттілігін зерттеген Еуропаның елшілері де, зерттеушілері де тарихқа жазып қалдырған. Ал енді VІІІ ғасырда біздің Қаратал өзенінің солтүстік шығыс жағында Талды деген ауыл болған екен. «Тәуелсіздік бәрінен қымбат» деген мақаласында ел Президенті қазақтың тарихын бүгінгі заманауи технологияның көмегімен қайта объективті түрде жазу керек деген тапсырма берді. Соған байланысты қазір қызығушылық өте көп.
Бастапқыда Талдықорғанның жағдайы мәз болмады. Алматы облысы көшіп барғаннан кейін қарқынды жұмыс басталды. Әлеуетті, танымал облыс болғандықтан осы 20 жылдың ішінде өте үлкен жұмыстар атқарылды. Оны бір сөзбен айта салу қиын. Бірақ, менің білетінім, қазіргі облысты басқарып отырған облыс әкімі Амандық Баталов қаланың дамуына үлкен еңбек сіңірді. Бір жағдайды айтудың өзі ғана көп мәселені айқындайды. Елбасы біздің Қазақстанның орталығын Астанаға көшірерде: «Астана – астана болу үшін оған 32 түрлі критерий керек. Соған сай болғанда ғана астана Астана болады», – деп өзінің зерттеуін айтқан болатын. Содан кейін ғана астананы көшіріп, соның арқасында бүгінгі Нұр-Сұлтан қаласы ұлттық идеология орталығына айналды. Сол арқылы Қазақстанымыз бүкіл әлемге танылды. Ал енді біздің облыс әкімі Баталовтың мақсаты – Талдықорған қаласын халықаралық дәрежедегі қалаға айналдыру болды. Нәтижесінде, республикалық мәні бар облыс орталығы болғанның өзінде де халықаралық деңгейдегі мәртебеге сай қалаға айналды. Соған лайық бесжұлдызды қонақүй салынды. Мұнда қазір саяси, мәдени-спорттық халықаралық кездесулер өткізіліп жүргенін де жақсы білеміз. Бүкіл инфрақұрылымдар жасалды. Мәдениет ошағы – үлкен театр салынды, жүзу бассейні, спорт кешені, жалпы қаланың бүгінгі әрленуі, сәулеті бүкіл заманауи талаптардың бәріне сай дамып келе жатыр.
Мен сол қалада 5-6 жыл жұмыс істегендіктен де жақсы білемін, қаланың әлеуметтік-мәдени, тұрмыстық ахуалы адам сенгісіз жақсы жаққа өзгерді. Қалаға газ барды. Мен сол жобаның басы-қасында болып, соған атсалысқанымды мақтан етемін. Қаланы орталық жылу жүйелерімен қамтамасыз етудегі жұмыстар өте жоғары деңгейде атқарылды.
Жалпы, Талдықорған қаласы 20 жылдың ішінде халықтың күш-жігерінің арқасында біздің көз алдымызда дамып, 80 пайызға жаңарды, жақсарды. Қаланы үлкен тарихы бар қалалардың ешқайсымен салыстыруға болмайды. Өте сәулетті, дамыған, шағын қала. Осыған сүйсінген кейбір шет облыстардағы жағдайы бар азаматтар басқа қалалардан көшіп кеп, орналасуда. Мұның өзі тектен-тек емес. Оның экологиялық артықшылығын бағалағандық болса, екінші жағынан қаланың мәдени дамуы мен халықтың пейілі де көптеп қоныстануға басты себеп. Президентіміз «Тәуелсіздік бәрінен қымбат» деген мақаласында айтты ғой, «тәуелсіздігіміздің үш тағаны бар, ол – жеріміз, тіліміз, берекелі бірлігіміз» деп. Соның барлығы біздің облысымызда, соның ішінде Талдықорғанда айшықталып көрініп тұр. Сондықтан да Талдықорғанның облыс орталығы болған 20 жылдығы ел тәуелсіздігінің 30 жылдық мерекесі қарсаңында атап өтетін айтулы дата саналады. Оның дами беруіне біз әрқашан тілектеспіз және аянбай атсалысамыз.
Ызғарбек Бектұрсынов,
Алматы облысының
Құрметті азаматы
