Кеше Жетісу жеріне табан тіреген Жапонияның Төтенше және Өкілетті Елшісі Джун Ямаданы облыс әкімі Бейбіт Исабаев қабылдады. Кездесуде аймақ басшысы Қазақстан мен Күншығыс елінің достық қарым-қатынасы мен Жетісу өңіріндегі әріптестік байланысты нығайту төңірегінде сөз қозғалды. Сөз арасында «Асар» спорттық-сауықтыру орталығына қолдау білдіргені үшін елшілік өкілдеріне алғысын білдірді.
– Жетісу – тек ауылшаруашылық аймақ қана емес, туризмді дамытуға қолайлы өңір. Жапония сакура гүлдегенін мерекелесе, Сиверс алмасының отаны саналатын біздің өңірде осы жемістің гүлдеуін ерекше атап өтеміз. Қос мемлекеттің достығы мен ынтымақтастығы сауда-саттық және тауар айналымын арттыруға оңтайлы жағдай туындатуда. Дейтұрғанмен, биылғы 4 айда тауар айналымы 400 мың долларды құрады. Осы көрсеткішті арттыруға біз де мүдделіміз. Жапонияның Қазақстандағы елшілігіне ілтипатымыз зор. «Шөп тамыры» бағдарламасы өзегінде өңірдегі мүмкіндігі шектеулі тұрғындарды сауықтыруға жәрдемдесуде. Әрбір адам жайлы және қолайлы жағдайда өмір сүруі қажет. Қос тарап мүгедектерге жәрдемдесу арқылы жақсылықтың жаршысына айналдық, – деді облыс әкімі Б. Исабаев.
Аймақ басшысы ауылшаруашылығын және туризмді дамытуға Жапониядан инвесторлар тарту керегін алға тартты. Тіпті, сейсмикалық қауіптілікті қалыпты өмірмен ұштастырған ғылыми жетістіктерді бөліссе деген ұсынысын да жеткізді. Өз кезегінде сөз алған Джун Ямада Алматы облысының бөлініп, Жетісу облысының іргесі қаланғанына 2-ақ жыл толғанына қарамастан жақсы нәтижелерге қол жеткізген облыс басшылығына алғыс білдірді. Өңірде жапон ғалымдары мен кәсіпкерлеріне жаңа мүмкіндіктерге қол жеткізуіне толық мүмкіндік барын да тілге тиек етті.
– Біз достықты жоғары бағалаймыз. Бірлесіп жаңа мүмкіндіктерге қол жеткіземіз. Қазақстанның біршама өңірінде болдым. Дамуды тұрмысына арқау еткен бұл елде 3 жылдан бері қызмет етудемін. Қазақстан мен Жапония арасында бауырлас қалалар тәжірибесін енгізуді қалаймыз. Бұл достық туын одан әрі биіктетері сөзсіз, – деді Елші.
Аймақ басшысы ұсынысты жан-жақты таразылайтынын жеткізіп, Жапонияның Төтенше және Өкілетті Елшісі Джун Ямадаға Жетісу өңірінің ғажайыбын тамашалауды ұсынды.
Дастанбек САДЫҚ
