Дүниежүзілік денсаулық сақтау ұйымының медициналық-санитарлық алғашқы көмек көрсетуге байланысты демонстрациялық платформасы базасында оқудан өту үшін Қазақстанға Қырғызстанның денсаулық сақтау министрлігі өкілдері мен медициналық ұйым басшылары келді.
Қырғыз Республикасы делегациясының жұмыс сапары аясында Еңбекшіқазақ аудандық емханасында медициналық-санитарлық алғашқы көмек көрсету тәжірибесін зерделеу үшін көпсалалы бригадаларды дамытудағы халықаралық үрдістер мен Қазақстандағы медициналық-санитарлық алғашқы көмек көрсету реформасының тәжірибесі атты «дөңгелек үстел» өтті.
Іс-шара барысында медициналық-санитарлық алғашқы көмек көрсету шеңберінде қызмет көрсету жүйелері мен оны дамытудың басым бағыттары және халықаралық тәжірибе егжей-тегжейлі талқыланды. Сондай-ақ, әлеуметтік медициналық сақтандыру қорының МСАК-ты қаржыландырудағы тәжірибесі және көптеген бейінді бригадалар мен отбасылық дәрігерлердің функционалдығы жөнінде мәселелер талқыланды.
Шара аясында ҚР Денсаулық сақтау вице-министрі Вячеслав Дудник 1978 жылы қабылданған Алматы декларациясы бойынша бүкіл әлемде, оның ішінде Қазақстанда медициналық-санитарлық алғашқы көмек көрсетуді ілгерілету мен дамыту басталғанын ерекше атап өтті.
Айгүл БАЙЖҰМАҚЫЗЫ
Еңбекшіқазақ ауданы
Алматы облысы
