«Мектепке дейінгі ұйымның үздік педагогі» республикалық байқауында жеңімпаз атанған Текелі қаласындағы №2 балабақша тәрбиешісі Айжан Маткаримова Елорда төрінде «ҚР білім және ғылым саласына қосқан ерен еңбегі үшін» төсбелгісіне ие болды.
Байқауды ұйымдастырған «Bilim orkenieti» ұлттық инновациялық ғылыми-зерттеу орталығы республика бойынша мектепке дейінгі ұйым педагогтерінің байқауға өткізген жұмыстарын сараптап, осыған дейінгі жетістіктерін ескерді. І дәрежелі дипломмен марапатталған А. Манапқызы төсбелгімен бірге өзінің өмірбаяны енген «Мектепке дейінгі ұйымның үздік педагогі» кітабын иеленді.
14 жыл балабақша тәрбиешісі болып, бүлдіршіндердің жүрек түкпірінен орын алған үздік тәрбиешінің ізденіске, жаңашылдыққа толы еңбегін әріптестері де, балаларын қолына сеніп тапсыратын ата-аналар да жоғары бағалайды.
Бастапқыда банк саласында қызмет істеген Айжанның бүйрегі педагогтік жұмысқа бұрды да тұрды. 2008 жылы №2 балабақшаға тәрбиеші болып орналасты. Құштарлықпен айналысқан әр ісі жемісін беріп жатты. Бірде баламен бала болды, бірде мейірімді ана, ұлағатты ұстаз, тіпті, кей балаға әже де болды. «Балдәурен» санаторлық-сауықтыру тобында тәрбиешілік еткелі әр баланың денсаулық жағдайына, ой-өрісімен қатар, физикалық тұрғыдан жетілуіне ерекше мән берді. Тәрбиеші ағылшын тіліне де жүйрік. Бос уақытында әдеби, тарихи кітаптар оқиды, компьютерлік бағдарламаларды да шырқ үйіреді.
– Әдіскерлермен, жоғары санатты тәрбиешілермен бірігіп «Табысты тәрбиеші» атты педагогтер альянсын құрдық. Тәлімгерлік көмек көрсету мақсатында «Шеберлік баспалдағы» атты жас мамандар мектебі жұмыс істейді. Енді жергілікті әдістемелік кабинетпен ақылдасып, қалалық «Үздік тәрбиешілер» қауымдастығын құру жоспарда бар, – деген Айжан Манапқызы ұрпақ тәрбиесіне асқан жауапкершілікпен қарап келеді.
Тәрбиешілік міндетіне адал Айжан – көпбалалы ана, отбасының ұйытқысы. Өмірлік серігі Асыл Тайыржанұлының үнемі қолдап-қуаттауы оған күш-жігер сыйлап, шығармашылық еркіндікпен алаңсыз айналысуына мүмкіндік береді.
ӨЗ ТІЛШІМІЗ
Текелі қаласы
Жетісу облысы
