«Жастар» спорт кешенінде мүмкіндігі шектеулі балаларға арналған «Бочча» және «Адаптивті жүзу» спорт түрлерінен жаңа секция ашылып, шеберлік сабағы өтті.
Аталмыш секция «Nur Otan» партия мен «Тең мүмкіндіктер қоғамы» қоғамдық бірлестігінің «Кедергісіз келешек» және «Саламатты болашақ» жобалары аясында ашылды.
Шарада сөз алған «Nur Otan» партиясы облыстық филиалы төрағасының бірінші орынбасары Гүлнар Тойлыбаева:
– Партияның «Жол картасында» инклюзивті білім беру, бұқаралық спортты дамыту мәселесі қолға алынды. Бас партияның бастамасымен инфрақұрылымдардың мүмкіндігі шектеулі жандарға қолжетімділігін қамтамасыз ету үшін 5 жылға 1 294 нысанға бейімделу жұмыстары жүргізілмек. Ағымдағы жылға 258 нысанға бейімделу жұмыстарын жүргізу жоспарлануда. Оның ішінде 145 нысанға 141,4 млн. теңге көлемінде қаражат бөлінді, – деді.
Өз кезегінде «Тең мүмкіндіктер қоғамы» қоғамдық бірлестігінің төрайымы Нұргүл Ұлжекова Талдықорғанда, балалар бейімделетін спорттың дамуына 2016 жылдан бастап қолдау көрсетіліп жатқанын айтты. Сонымен қатар мүмкіндігі шектеулі балаларға арналған секция өңірімізден бөлек он екі қалада ашылғандығын жеткізді.
Осыдан кейін облыстық дене шынықтыру және спорт басқармасы басшысының орынбасары Алмат Үшкемпіров, мүгедек балаларға арналған спорт мектебінің директоры Ерлан Бақтыбаев ізгі тілектерін білдірді.
Соңында партия басшылығы, қоғамдық бірлестік пен облыстық спорт басқармасы өзара келісім жөнінде меморандумға қол қойды.
Салтанатты ашылу «ерекше» бүлдіршіндердің алғашқы бочча сайысымен және партия тарапынан естелік сыйлықтарымен жалғасты. Алдағы уақытта ашылған секцияларда ерекше күтімге мұқтаж 20 бала тегін спортпен айналысатын болады. Оларға қоғамдық қордың ұйымдастыруымен 2 жаттықтырушы арнайы оқыту әдістемесі негізінде демеушілердің көмегімен алынған спорттық құралдармен жаттығуға жәрдемдеседі. Енді мүмкіндігі шектеулі және аз қамтылған отбасыларға арналған секцияда бүлдіршіндер тегін жаттыға алады.
Айдар ҚАЛИЕВ
