Аудан әкімдігінде Панфилов аудандық соғыс және еңбек ардагерлері ұйымының есепті конференциясы өтіп, ел мен жердің амандығын, мемлекет тыныштығын дұға-тілегіне қосатын қарияларға қатысты мәселелер қаралды. Жаркент қалалық және ауылдық округтердегі бастауыш ұйымдардың төрағалары мен әкімдер, алқа мүшелері, БАҚ өкілдері шақырылған басқосуға облыстық ардагерлер кеңесінің төрағасы Ермек Келемсейіт, аудан әкімі Талғат Өмірәлиев, аудандық мәслихат хатшысы Ерғали Шоқпаров қатысып, аудан көлемінде атқарылған жұмыстардың нәтижесімен танысты.
Алқалы жиында Панфилов аудандық соғыс және еңбек ардагерлері ұйымының төрағасы Нұриахмет Рахымбаев соңғы бес жылда атқарылған жұмыс туралы баяндама жасап, өңірдегі зейнеткерлер мен тұрмысы төмен отбасыларына көмек көрсету және жастар тәрбиесіне оң ықпалын тигізетін әртүрлі шаралар жөнінде баса айтты. Баяндаманы талдауға қатысқан Көктал бастауыш ұйым төрағасы С. Солтанқұлов, Жаркент қаласы бастауыш ұйым төрағасы К. Важитова, Үшарал бастауыш ұйым төрағасы Т. Ибрайымов, Алтыүй бастауыш ұйым төрағасы А. Бейсенбеков өз округтерінде жүзеге асқан игілікті шараларды таныстырып, аудандық ардагерлер ұйымының есепті мерзімде атқарған жұмысына қанағаттанарлық деген баға берді.
Күн тәртібіндегі екінші мәселе бойынша аудандық соғыс және еңбек ардагерлері ұйымы тексеру комиссиясының төрағасы Н. Рақымжанов баяндама жасап, есепті мерзімде жұмсалған қаржы нақты істерге жаратылғанын мәлімдеді.
Конференцияда ұйымның алқа мен тексеру комиссиясының мүшелері қайта сайланды. Жиында аудандық соғыс және еңбек ардагерлері ұйымының төрағасы Нұриахмет Рақымбаев денсаулығына байланысты төрағалықты өткізіп беретінін жеткізді. Осыған орай бұрын өңірде жауапты қызмет атқарған зейнеткер Тоқтарбай Керімқұлов қоғамдық ұйымның төрағалығына сайланды.
Мырзағали Нұрсейіт
Панфилов ауданы
