Бейсен Құранбек атындағы Журналистер үйінде «Жанұя» отбасын қолдау орталығы жұмысының басталғаны туралы брифинг өтті. Бұл жайлы Талдықорған аймақтық әйелдерді қолдау орталығының президенті Жанар Нұрмұханова баяндады.
Биыл «Жанұя» әлеуметтік орталығы 2020 жылдың қаңтар айынан бері жұмыс істеуде. Орталық тек Талдықорған қаласындағы тұрғындарды қамтиды.
«Жанұя» әлеуметтік орталығының атауы «Жанұя» отбасын қолдау орталығы деп өзгертілді. Алайда, ұсынылатын қызметтері мен жұмысы сол қалпында.
Мекеменің мақсаты – азаматтардың жекелеген санаттарына консультациялық қызметтер кешенін ұсыну, өмірлік қиын жағдайға тап болған әрбір отбасыға психологиялық, әлеуметтік және заңгерлік көмек көрсету, сондай-ақ, отбасы институтын жан-жақты қолдау және нығайту. Бұл өз кезегінде отбасының әлеуметтік мәселелерін кешенді шешуді, өмірлік қиын жағдайға тап болған әрбір отбасыға жекелей түрде жүзеге асыруға мүмкіндік береді.
Орталықтың көрсететін қызметіне осы күнге дейін 7197-ге жуық азамат жүгінген. Негізгі міндеті – халықтың әлеуметтік осал топтарына тегін заңгерлік көмек беру. Орталықтың заңгеріне 2875 көпбалалы және аз қамтылған отбасы хабарласса, 4123 адам бір реттік заңгерлік кеңес алған. Заңгер 3184 ауызша құжат ұсынып, оның ішінде 528 құқықтық құжат құрастырып, соттар мен мемлекеттік органдарда 114 өкілдік жүргізген. Сондай-ақ, өтініш білдіргендердің арасында азаматтар, әрекетке қабілетсіздердің қамқоршылары және кәмелетке толмағандардың қамқоршылары болды. Соның ішінде меншік құқығы, қорғаншылық, алимент, әлеуметтік қолдау шараларын қамтамасыз ету сынды өтініштер де жиі кездеседі.
Әнел АНАПИЯНОВА
