Қасым-Жомарт Тоқаев жаппай цифрландыру азаматтардың тұрмыс сапасын едәуір жақсартып, Қазақстанның орнықты ғылыми-технологиялық дамуына негіз болатынын атап өтті, – деп хабарлайды 7-su.kz ақпараттық порталы Ақордаға сілтеме жасап.
Президенттің айтуынша, жаппай цифрландыру мен жасанды интеллект технологияларын енгізу арқылы экономиканы жан-жақты жаңғырту жуырдағы Жолдаудың басты өзегіне айналды.
– Бұл міндет ғылым саласына, әсіресе, атом сияқты инновациялық бағыттарға тікелей қатысты. Цифрлық шешімдер ядролық нысандардың жұмыс циклін тиімді басқаруға мүмкіндік береді. Сонымен қатар шығынды азайтып, қауіпсіздікті күшейтеді. Жасанды интеллект бұл мүмкіндіктерді бірнеше есе арттыра алады, – деді Мемлекет басшысы.
Тоқаев тарихи мысалдарды да келтіріп өтті. XV–XVI ғасырларда әлемдік экономиканың 60 пайызын иеленген Қытай индустриалды революцияны жіберіп алып, әлсірегені белгілі. Кейінгі басшылар бұл қателіктен сабақ алып, ғылым мен жоғары технологияға басымдық беріп, қазіргі таңда әлемдік державаға айналды.
– Сондықтан жаппай цифрландыру мен жасанды интеллектіні енгізу – біздің ұлттық стратегиямыз. Қазақстанның озық елдер қатарына қосылуы осы идеяны жүзеге асыруға тікелей байланысты. Бұл саясат жастар арасында кең қолдау тауып отыр. Дегенмен қоғамда күмәнмен қарайтындар да бар. Бірақ еліміз үшін басқа жол жоқ. Әйтпесе даму көшінен қалып, әлсіз елге айналамыз. Бұл – жай ғана бәсеке емес, ең алдымен, Қазақстанның дербес мемлекет ретінде өміршеңдігі, – деді Президент.
