Облыс орталығы Талдықорған қаласында «Ре-соль» шығармашылық орталығының ұйымдастыруымен «Бабалар аманаты» атты IV республикалық байқау өтті.
Республикалық деңгейде ұйымдастырылған байқауда Сарқан ауданы, Қойлық ауылындағы К. Қазыбаев атындағы Мәдениет үйіне қарасты «Қызғалдақ» би тобы бас жүлдені қанжығаға байлады. Өнерпаздар Біріккен Араб Әмірлігіндегі Дубай қаласына жолдама ұтып алды.
«Балауса», «Star» би топтары І орынға ие болса, «Көктем» би тобы ІІ орынға лайық деп танылды. Жеңімпаздар арнайы дипломмен, естелік сыйлықпен марапатталды.
Болашақтарынан көп үміт күттіретін бүлдіршіндерді байқауға дайындаған Әсел Сыдықбектің ерен еңбегін ерекше атап өткеніміз жөн.
Талай би байқауларында оза шауып, ауданның, өңірдің атын шығарып, мәдениеттің дамуына өзіндік үлес қосып жүрген бүлдіршін бишілерге сәттілік тілеп, биіктен көрінуіне тілекшіміз.
Жақсылық ЖОМАРТҰЛЫ
