Облыстық жастар саясаты мәселелері басқармасының, жастар ресурстық орталығының ұйымдастыруымен Жастарға қызмет көрсету орталығында Қазақстан Республикасы Тәуелсіздігінің 30 жылдығына орай «Төртінші онжылдықтағы Тәуелсіз Қазақстан» атты жастар форумы өтті.
Жастар ұйымдарының төрағалары, белсенді жастар, жас кәсіпкерлер және ауыл жастары қатысқан жиында облыстық жастар саясаты мәселелері басқармасы басшысының міндетін атқарушы Ұлан Боранбайұлы жетісулық жастардың атқарып жатқан жұмыстарымен таныстырды.
– Қазіргі уақытта облыста 7500-ге жуық ерікті және 96 еріктілер ұйымы тіркелген. «Қайырымды істер марафоны» жалпыұлттық жобасы аясында облыста 4000 акция өткізіліп, 622 млн. теңге көлемінде 16 000-нан астам отбасыға азық-түлік себеттері, мұқтаж болған 89 отбасыға баспана және Маңғыстау облысындағы жағдайға байланысты көмекке 60 100 тайланған шөп табысталды, – деген ол коронавирустық инфекцияның алдын алу мақсатында волонтерлер жыл басынан 100 000-ға жуық бетперде таратқанын айтты.
Форумда сөз алған облыстық ардагерлер ұйымының төрағасы Ермек Келемсейіт, «Сип Таун» ЖШС директоры, жас кәсіпкер Алишер Манликов, облыстық мәслихаттың депутаты Дамир Дигай және «Мейірімді Жетісу» еріктілер фронт-кеңсесінің үйлестірушісі Айым Елтайқызы ұсыныстарын жеткізіп, жалынды сөздерімен жастарға жігер сыйлады.
Мәулен Даниярұлы
