Саты ауылдық Мәдениет үйінде балалар жылы аясында дара тұлға – Мұқағалидың ұлы Жұлдыз Мақатаевпен жылышырайлы кездесу өтті.
Кездесуге ауылдағы А. Түркебаев атындағы мектеп-лицей оқушылары, Мәдениет үйі жанындағы үйірменің балғын өнерпаздары қатысты. Әсерлі басқосуда балалар Мұқағали жырларын жатқа айтты. Жүрекжарды шығармаларын оқыды. Ақынның өмірі мен шығармашылығынан да хабардар екенін байқатты. Ақын ұлына түрлі сұрақ қойып, толымды жауап алды.
Гүлбақыт Баймұханбет жетекшілік ететін домбыра, дәстүрлі ән үйірмесіне қатысушылар мен «Еркеназ» балғын бишілер тобы концерттік бағдарлама ұсынды. А. Түркебаев атындағы орта мектеп-лицейдің кітапханашысы Жанна Қуанышева Мәдениет үйінің кіреберісіне көрме ұйымдастырды. Жұлдыз Мұқағалиұлы балаларға әкесі, отбасы, балалық шағы туралы әсерлі естеліктерімен бөлісті. Мұқағали туралы естеліктер енген «Есіңе мені алғайсың» жинағын ауыл және мектеп кітапханасына сыйға тартты.
Саты ауылдық округінің әкімі Рүстем Әлімов ауыл балалары үшін арнайы ұйымдастырылған жүздесуге алыстан ат арытып келген Жұлдыз Мұқағалиұлына, ақынның келіні, халықаралық «Мұқағали» қорының төрайымы Бақытгүл Айдароваға ауыл тұрғындарының, балалардың атынан үлкен алғыс айтып, лайықты сый-құрмет көрсетті.
Қанат Біржансал
Кеген ауданы
Алматы облысы
