Биыл Қарқара жайлауының шөбі шүйгін. Өріске сән берген төрт түлік мал жетерлік.
Кеген ауылының тұрғыны Болатбек Асқаровтың «Ақзер» шаруа қожалығының құтты қонысын көрдік. Қожалықтың жылқышысы әрі бақташысы Дүйсен Тұрдақынның тірлігіне куә болдық. Жел Қарқара – тамаша жайлау. Етектегі аңғарында арынды тау өзені ағып жатыр. Мұнда өріске қожалықтың төрт үйір жылқысы, жүзге тарта сиыры көрік беріп тұр.
– Қыс маусымында Темірлік өңіріндегі Бірімтай сайындағы қыстауда боламыз. Жағдайымыз жақсы. Жайлаудың шапағаты жоқ емес. Оншақты бие байлап, қымыз әзірлейміз. Зайыбым мен келінім сиыр сауып, май шайқап, құрт, ірімшік жасаумен айналысады. Мұның бәрінің бағасы артқан. Пайдасы мол. Жаздың әр күнін тиімді пайдаланғаннан ұтыларымыз жоқ, – дейді қожалықтың малшысы Дүйсен Тұрдақын.
Жаз маусымында Дүйсеннің ұлы Асхат пен келіні Ұлжалғас көмек көрсетеді екен. Еңбекқор зайыбы Маржанкүлдің де ертелі-кеш айналысатын шаруасы жетерлік. Кішкентайынан малды ауылдың тірлігімен өскен Дүйсеннің бесаспап екені көрініп тұр. Уақтылы бие сауу – оның күнделікті ісі. Май, маңыз, құрт, ірімшік – ақ дастарқанның ажары. Жайлаудың шапағаты, берекесі деген осы.
– Ауылдағы балам мен келініме арнап салған үйімізді бітіріп қойдық. Алла қаласа, туыс-туған, ел-жұртқа бір шәугім шай беріп, қоныс тойын жасасақ деген ниеттеміз, – дейді Дүйсекең жылы жымиып. «Бәрекелді! Қоныс тойы құтты болсын! Жақсылық мол болсын», – дедік.
Қанат БІРЖАНСАЛ
