Талдықорған қаласында қасиетті «Рамазан» айының құрметіне қала тұрғындары арасында «Жетісу марафоны» ұйымдастырылды. Бұқаралық спорттық сипат алатын марафонға 400- ден аса қала тұрғыны қатысты.
Шашасына шаң жұқпайтын желаяқтардың қатарында жас жеткіншектер, қыздар, ересек адамдар және халықаралық аренада өнер көрсеткен белгілі спортшылар мен мемлекеттік қызметкерлер де қатысты. Қабанбай батыр ескерткішінің алдынан тізгін босатқан желаяқтар, «Жастар» саябағына дейін жүгіріп өтті. 5,5 шақырымды бағындырған желаяқтар өздерінің жарысқа үлкен даярлықпен келгенін көрсетті. Бұған дейін де мұндай марафондар болған. Өкінішке қарай, біраз жыл пандемияның кесірінен тоқтап қалып еді. Енді міне, қайта жалғасын тауып, спорт сүйер қауым марафонға үлкен серпінмен қатысты. Сонымен кіші марафонға қатысқан мықтылардың арасында бірінші болып (ерлер) Нұрзат Күнболатұлы (24:10) келді. Екінші орынға Ернар Жұмамұрат (24:16) жайғасса, үздік үштікті Қадырбек Жанболат (25:21) құрады. Әйелдер арасында тұлымшағы желбіреп, мәрені бірінші болып қиып өткен Сания Құдайберген (28:12) жеңімпаз атанды. Күмісті Аяна Болатбекқызы (28:38) еншілесе, қолаға Руслана Сысоева (30:05) қол созды. Жеңімпаздарды облыстық дене шынықтыру және спорт басқармасының басшысы Нұрбақыт Теңізбаев марапаттады.
Ришад ТҰРҒАНБАЙ,
Алматы облысы
