Бүгін Талдықорғанда Жетісу облысындағы жастардың әлеуметтік, экономикалық және құндылықтық жағдайына арналған кешенді «Жетісу жастары» аналитикалық баяндамасы таныстырылды. Бұл – өңір тарихында алғаш рет жүзеге асқан кең ауқымды әлеуметтік зерттеу.
Зерттеу нәтижелері түрлі деңгейдегі мүдделі тараптардың қатысуымен талқыланып, кең ауқымды аудиторияны қамтыды: мемлекеттік мекеме өкілдері, зерттеу объектісіне кіретін жастар тобы, сала сарапшылары, сондай-ақ ҮЕҰ, еріктілер ұйымдары мен жастармен жұмыс істейтін қоғамдық бірлестіктер және ақпараттық таратуға жауапты БАҚ, журналистер мен жаңа медиа өкілдері қатысты.
Зерттеу Жетісу облысы Қоғамдық даму басқармасының қолдауымен, «Азаматтық бастамаларды қолдау орталығы» КЕАҚ гранты аясында «Жоғары жастар кеңесі» қоғамдық бірлестігімен дайындалды. Баяндаманың деректері мемлекеттік органдар статистикасына, жаппай сауалнамаға, фокус-топтық талқылауларға және сараптамалық сұхбаттарға негізделген.
Жетісу облысында жастар саясатын жүзеге асыру аясында өңір жастарына жан-жақты жағдай жасалып келеді. Шешім қабылдау барысында бүгінгі жастардың нақты қажеттіліктері мен сұраныстарын ескеру аса маңызды. Осы аналитикалық баяндама Жетісу жастарының өмір сапасы, құндылықтары, мүмкіндіктері мен әлеуметтік көңіл-күйіндегі негізгі трендтерді айқындауға мүмкіндік береді және өңірлік жастар саясатын одан әрі жетілдіруге бағдар бола алады, – дейді Жетісу облысы қоғамдық даму басқарма басшысының орынбасары Ілияс Нұрболұлы.
Зерттеу барысында 693 респондент арасында сауалнама жүргізіліп, 5 фокус-топтық талқылау ұйымдастырылды (оқушылар, студенттер, жұмыссыз жастар, ауыл жастары, кәсіпкерлер). Сонымен қатар 10 сараптамалық сұхбат өткізілді. Деректер 15-34 жас аралығындағы жастарды қамтыды.
Баяндамада жастар өміріндегі білім және дағды, еңбек нарығы, азаматтық белсенділік және саяси қатысу, мемлекеттік бағдарламар және жобалар, ең өзекті мәселелер, баспана мәселесі, ақпараттану көзі және болашаққа көзқарас, көші-қон көңіл күйі, репродуктивті денсаулық және жыныстық тәрбие, қауіпсіздік мәселесі, буллинг, кибербуллинг және суицид, нашақорлық және құмар ойындар, жастардың әлеуметтік-экономикалық жағдайы, этносаралық жағдай мен діни бірегейлік және неке мәселелері қамтылды.
Зерттеу нәтижесі Жетісу жастарының әлеуеті жоғары екенін көрсетті: сауалнамаға қатысқан жастардың 90,2%-ы білім сапасына қанағаттанатынын айтқан, ал 55,2%-ы ЖОО таңдауда ең маңызды фактор ретінде қалаған мамандықты атады. Мемлекеттік бағдарламаларға қызығушылық жоғары – жастардың 71,4%-ы өңірлік гранттарды тиімді деп бағалаған. Сонымен қатар, тұлғалық даму динамикасы байқалады: жастардың 33,4%-ы қосымша курстар мен дағдыларды меңгеруге белсенді қатысуда.
Еске сала кетейік, 2025 жылдың басында өңірдегі жастар саны 186,1 мың адамды құрады (жалпы өңір халқынан жастардың үлесі – 26,8%). Құрылымы бойынша жастардың 83 мыңы (44,6%) қалада, қалғаны ауылда тұрады.
Жетісу облысының қоғамдық даму басқармасы
