Талдықорған қаласының тұрғыны Андрей Плаутиннің кәсіппен айналысып келе жатқанына 5 жыл. Оның қазір «Жетісу Эко» деп аталатын шеберханасы бар.
Шеберханада әртүрлі өнім шығарылады. Дайын бұйымдар тек Жетісу жерінде ғана емес, сондай-ақ одан тыс жерлерде де танымал. Андрей Плаутиннің кәсібі сандық басқаруы бар құрылғыларға деген қызығушылықтан басталды. Бұл құмарлық кәсіпкердің өз шеберханасын ашуына ықпал етті. Онда ол өзінің шығармашылық ойларын құрылғылармен лазерлік кесуді қолдана отырып жүзеге асырады. Сөйтіп, ол сапаға мән бере көзтартарлық бұйымдар жасайды. CNC машиналары өте жоғары өңдеу дәлдігін қамтамасыз етеді.
– Мен құрылғымен ескерткіштерге ойып жазамын. Сонымен бірге гүл шоқтарына арналған себеттер жасап, қалай да тапсырыс берушінің талабынан шығуға тырысамын. Әртүрлі идея көбіне шеберханада жұмыс істеп отырғанда келеді. Сол ойларымды сапалы іске асыруға асығамын, – дейді Андрей Плаутин.
Экологиялық таза өнімдер пластиктен жасалған заттарға қарағанда үнемі сұранысқа ие. Кәсіпкер бұйым жасауға негізінен ағаш, былғары, мата, шыны, тас сияқты табиғи заттарды қолданады. Сондықтан болар, қазір оның өнімдеріне сұраныс жоғары. Бір айда 70-тен аса ескерткіш, 200-ге жуық аксессуар сатылады. Алдағы уақытта ол өнім түрін көбейтіп, кәсібін кеңейтуді жоспарлап отыр. Сондай-ақ, тапсырыс берушілердің де қажеттілігін ескеріп, сұранысын қамтамасыз етуді мақсат тұтады.
Айта кетейік, кәсіпкердің шығарған бұйымдары табиғилығымен де ерекшеленеді. Андрей Плаутин өзінің ұлы Владиславқа да кәсіп жүргізудің қыр-сырын үйретіп, өз тәжірибесімен бөлісіп келеді. Сөйтіп, өнім жасаудың әдіс-тәсілін меңгертуде.
Облыстық кәсіпкерлер палатасының директоры Дәурен Оңалбаевтың сөзінше, табиғи заттан өнім шығару бұл экологиялық жағынан өте тиімді әрі табысты кәсіп. Яғни, бұл қоршаған ортаны сақтауға мүмкіндік береді.
Айгүл Байжұмақызы
Талдықорған қаласы
