«Nur Otan» партиясынан облыстық мәслихат депутаттығына үміткер Сұлтан Нұрдаулетов «ZOOM» бағдарламасы арқылы Талғар ауданының ардагерлерімен кездесіп, партияның аудандық сайлауалды бағдарламасында межеленген жоспарларды баяндады.
Сайлауалды бағдарламада аудан дамуының негізгі 7 басым бағыттары айқындалған. Тұрғындарды толғандыратын мәселелер басшылыққа алынып, алдағы бес жылдық жоспар жобаланған. Лайықты жалақысы бар жаңа жұмыс орындары құрылатынын айтқан Сұлтан Нұрғайыпұлы:
– 2022 жылы ауданда металл конструкцияларынан бұйымдар өндіретін және шатыр және сайдинг панельдерін дайындайтын 2 зауыт салынады. 2023 жылы көбіктенген пенополистиролдан бұйымдар өндіру, мұздануға қарсы сұйықтық өндіру, құю бұйымдарға арналған 3 зауыттың құрылысы басталады. Ал 2024 жылы бетон және темірбетон бұйымдарын өндіру бойынша 2 зауыт салынады. 2025 жылы өсімдіктерді қорғау құралдарын өндіру зауытын салу жоспарланған, – деді.
Сондай-ақ, ауданда тұрақты жұмыс орындарын құру бойынша кешенді шаралар қабылдау қолға алынғанын, бес жыл ішінде өңірде 10 мыңнан астам жұмыс орны ашылатынын тілге тиек еткен Сұлтан Нұрдаулетов еңбек нарығының қажеттілігі ескеріліп, мамандарды қайта даярлау бағдарламаларын тиімді іске асыруға қол жеткізілетінін атап өтті. Онлайн форматта өткен кездесуде қойылған сұрақтарға толық жауап берген үміткер ардагерлерді сайлауға белсенді қатысуға шақырып, өз таңдауларын жасауға үндеді.
Д. АРШЫН
