Облыс әкімі аппаратының әдеп жөніндегі уәкілі Ғабит Тұрсынбай «ZOOM» бағдарламасы арқылы аудан, қала әкімдері аппаратының әдеп жөніндегі уәкілдерімен жиын өткізді. Онда 2020 жылдың қорытындысы және 2021 жылда атқаратын жұмыстар мен міндеттер туралы айтылды.
Қоғамдағы үздіксіз жаңғыру үдерісі әдеп жөніндегі уәкілдер институты қызметінің жауапкершілігін арттыра түсуде. Сол себепті, Ғабит Тұрсынбайұлы әдеп жөніндегі уәкілдердің жұмысын жетілдіруге бағытталған шараларды сөз етті.
– «Болашаққа бағдар: рухани жаңғыру» мақаласы шеңберінде әзірленген, ҚР Мемлекеттік қызмет істері агенттігі іске асырып жатқан «Өзгерістерді өзіңнен баста» атты кіші бағдарламасына назар аударуымыз қажет. Бағдарламадағы мақсат-міндеттерді сапалы әрі тиімді ұйымдастыруға мән беруіміз керек. Сеніп тапсырылған қызметті абыройлы орындау әр уәкілдің жұмыс қағидатына байланысты болғандықтан мемлекеттік қызметтің сапасы да атқарылған жұмыстың нәтижесімен айқындалады, – деді ол.
Жарыссөзде пікір білдірген ҚР Президентінің жанындағы Мемлекеттік қызмет академиясының облыстық филиалының директоры Қазбек Шакишев мемлекеттік қызметшінің біліктілігін арттырып, шеберліктерін шыңдаудың, әдістемелік көмек көрсетудің маңызы зор екенін айтты. Ал, Алакөл ауданы әкімі аппаратының әдеп жөніндегі уәкілі Бақытбек Сүлейменов жоспардың жеке тармақтарындағы тимбилдинг, тайм-менеджмент әдістерін дұрыс қолдана отырып, мемлекеттік қызметшілердің жұмыс сапасын арттыруға бағытталған ойларымен бөлісті.
Жиын соңында Ғабит Тұрсынбай аудан, қала әкімдері аппараттарының әдеп жөніндегі уәкілдеріне осы бағыттағы жұмысты күшейтіп, көзделген іс-шараларды мерзімінен кешіктірмей үнемді әрі тиімді ұйымдастырып, өткізуді тапсырды.
М.ДАНИЯРҰЛЫ
