Жуырда Нұр-Сұлтан қаласында ҚР Мәдениет және спорт министрлігі Спорт және дене шынықтыру істері комитетінде облыстық спорт басқармалары басшыларының басын қосқан үлкен жиын өтті. Шараға Мәдениет және спорт министрі Ақтоты РАЙЫМҚҰЛОВА қатысты. Министр саладағы жетістіктер мен қордаланып қалған мәселелер жайлы басшылардың есебін тыңдады.
Сонымен қатар, 2019 жылдың қорытындысы бойынша спортшыларға, жаттықтырушыларға, дене шынықтыру және спорт саласындағы мамандарға «Үздік» номинация атақтарын берді.
Келелі жиында облыстық жоғары спорт шеберлігі мектебі «Жылдың үздік спорт ұйымы» номинациясымен марапатталды. Марапатты аталған мектептің директоры Нұркен Нуратов вице-министр Елдос Рамазановтың қолынан алды. Республика бойынша үздік атанған мектеп өткен жылы толайым табысқа кенелді. Әлемдік, халықаралық жарыстарда спортшылар жүлделі орындардан көрініп, облыс намысын жоғары ұстады. Мұнымен қоса, Токио Олимпиадасына бес бірдей жолдаманы жеңіп алған спортшылар да аталған мектептің түлектері. Дәл қазіргі уақытта Алматы облысының қоржынында бес жолдама. Алдағы уақытта тағы да бес жолдамаға үмітті. Сол үміт артқан спортшыларымыздың тең жартысы тағы да жоғары спорт шеберлігі мектебінің оғландары. Мұндай үздіктер қатарынан көрінудің бір белгісі, мектеп ұжымының еңбегі екені белгілі. Спорт басқармасынан үлкен қолдау тауып, спортшылардың жүлдеге қол жеткізуіне мүмкіндік туғызып отырған мектеп директоры Нұркен Қанатұлының еңбегін айта кеткен ләзім. Биыл Олимпиада жылы. Қазіргі уақытта төрт жылдықтың басты додасына дайындық қарқынды жүріп жатыр. Осы орайда мектеп басшысы дүбірлі додадан қоржынымыздың бос қайтпауын ойлап, тынымсыз еңбек етуде. Жыл басталысымен-ақ жарысқа баратын спортшылардың жағдайына алаңдап, оқу-жаттығу жиындарына жіберіп және оны арнайы барып, өз көзімен көріп, дайындықтарына алаңдаулы. Бұл білікті басшының үлкен қамқорлығы екені даусыз. Олай болса, Токиода Көк туымыз желбіресін!
Ришад ТҰРҒАНБАЕВ
