«Жаркент өңіріндегі мектеп пен балабақшалар қысқа дайын», – деп мәлімдеді БАҚ өкілдерімен кездесуде Панфилов ауданының басшысы Марат Сағымбек.
Оның айтуынша, Панфилов ауданында 42 мектеп пен 5 балабақша сұйық отын, 7 мектеп пен 6 балабақша қатты отын, 1 мектеп пен 1 балабақша орталықтандырылған қазандықпен жылытылады. Осы мекемелерге қажетті 1492862 литр дизель отыны толық жеткізілсе, қажетті 2199 тонна көмір қыркүйек-қазан айында әкелінбек.
Аудан орталығындағы Жамбыл және Х. Хамраев атындағы орта мектеп ғимаратын табиғи газға қосу жұмысының жобалық-сметалық құжаты әзірленіп, мемлекеттік сатып алу порталына хабарлама берілген. Қыркүйек айында газға қосылады деп күтілуде. Н. Крупская атындағы орта мектеп ғимаратын табиғи газға қосу үшін жобалық-сметалық құжаттамасын әзірлеуге қажетті қаржы бөлінген.
Сұйық отынға арналған пештерге сервистік қызмет көрсетуге арналған тендерді ұтып алған «Новиком Тараз» ЖШС өкілдерімен келісім жасалып, олар 50 білім беру мекемесі, 13 мемлекеттік балабақшаның пешін тексеріп, тазартып, жөндеп, жылыту маусымына дайындап қойды. Қыс кезінде ақау шыққан пештерді жөндеп, іске қосу жұмысын да аталған компания атқарады.
Жаркент округіндегі Головацкий және Алмалы ауылындағы Елтінді батыр атындағы орта мектептің жылу қазандығын ауыстыруға 7,1 млн. теңге бөлінген. Жаркент өңірінде қысқа дайындық жұмысы қарқынды жүруде.
Мырзағали НҰРСЕЙІТ
Панфилов ауданы
Жетісу облысы
