Жетісу өңірінде «Зорлық-зомбылыққа қарсы 16 күн» науқаны жалғасып жатыр, – деп хабарлайды Polisia.kz.
Бұл бастама жыл сайын 25 қараша мен 10 желтоқсан аралығында әйелдерге қатысты кемсітушіліктің барлық нысандарын жою туралы БҰҰ Конвенциясы аясында өткізіледі. Бүгінде акцияға әлемнің 180-нен астам елі қосылады.
Науқанның мақсаты – әйелдер мен қыздарға қатысты зорлық-зомбылық проблемасына назар аудару, отбасы құндылықтарын нығайту және қоғамның қауіпсіздік туралы ақпараттануын арттыру.
Полицияның мәліметінше, жыл басынан бері облыста 175 отбасылық-тұрмыстық қылмыс және мыңнан аса әкімшілік құқық бұзушылық тіркелген. Заң бұзушыларға екі мыңнан астам қорғау нұсқамасы беріліп, сот 400-ден астам арнайы талап қойған.
Полиция қызметкерлері мемлекеттік органдарды, БАҚ-ты, үкіметтік емес ұйымдарды және барлық азаматтарды акцияға үн қосуға шақырады.
