Журналистер үйінде «Жаңа оқу жылына дайындық» тақырыбында баспасөз конференциясы өтті. Аталмыш жиында облыстық білім басқармасының басшысы Айжан Адамбекова сөз алып, Жетісу облысы бойынша баяндама жасады.
– ҚР Оқу-ағарту министрінің жаңа 2022-2023 оқу жылын бастау жөніндегі бұйрығы қабылданды. Жаңа оқу жылы 36 оқу аптасынан тұрады. Оқу жылы 1 қыркүйекте басталып, 31 мамырда аяқталады, – деген Айжан Маманқызы, білім саласы бойынша жалпы мәліметтерді баяндады.
Биыл Жетісу облысында 130 мың бала мектепке барады деп күтілуде. Ол өткен жылмен салыстырғанда 3 мың оқушыға көп. Облыс колледждеріне 4 мыңнан астам студент қабылдау жоспарлануда. 73,3 млн. теңгеге облыстың барлық мектептеріне қажетті санитарлық-дезинфекциялық заттар сатып алынған.
– 2022 жылы 12 мектеп құрылысы салынуда. Оның ішінде 10 мектеп қолданысқа беріледі. Панфилов ауданы Басқұншы ауылындағы 300 орынды орта мектепті оқу жылының басында аяқтау жоспарда, қалған 9 мектеп ағымдағы жылдың соңына дейін аяқталады. Биыл 9 білім беру нысанының күрделі жөндеу жұмыстарын жасау жоспарланып, оған бюджеттен 4977,7 млн. теңге қаржы бөлінді, – деді басқарма басшысы.
Жиын барысында баяндамашы білім саласына қатысты өзге де шараларды пысықтап өтті. Жылыту маусымына дайындық жұмыстары, саяжай, шағын елді мекендерден қатынап оқитын оқушыларды тасымалдау жүйелі ұйымдастырылып, «Мектепке жол» акциясы қолға алынғаны баяндалды. Сонымен қатар, журналистердің сауалына тұшымды жауап берген басқарма басшысы білім саласы бойынша жаңа оқу жылына дайындық барысында ешқандай іркіліс жоғын атап өтті.
АРДА БИ
Жетісу облысы
