Премьер-министрдің орынбасары – Мәдениет және ақпарат министрі Аида Балаева қазақстандықтарды Аналар күнімен құттықтады. Бұл мереке елімізде мамыр айының екінші жексенбісінде аталып өтеді, – деп хабарлайды 7-su.kz ақпараттық порталы.
Министр өз құттықтауында ана мәртебесінің қоғамдағы орнына ерекше тоқталып, қазақ халқының дүниетанымында ана бейнесі әрдайым құрмет пен қадірдің символы болғанын атап өтті. Оның айтуынша, ұлт тәрбиесі мен отбасы құндылықтарының негізі – ананың тәлімі мен мейірімі.
– Бұл – мейірімге, алғыс пен құрметке толы ерекше әрі шынайы жылы мереке. Бұл күн бізге өмір сыйлаған, махаббаты мен қамқорлығын арнаған жандарға арналады, – делінген құттықтауда.
Сондай-ақ вице-премьер елімізде ана мен баланы қолдауға бағытталған мемлекеттік саясат тұрақты түрде жүзеге асырылып жатқанын жеткізді.
Оның ішінде әлеуметтік қолдау тетіктерін жетілдіру, мектепке дейінгі білім беру сапасын арттыру және жауапты ата-ана мәдениетін қалыптастыруға арналған бағдарламалар бар.
