15 мамыр – Халықаралық отбасы күні. Бұл мереке – шаңырақ шаттығын, отбасы бірлігі мен сыйластығын дәріптейтін ерекше күн. Осындай тағылымы мол мерекені жыл сайын дәстүрге айналдырып атап өтетін отбасылардың бірі – Нұрмұхановтар жанұясы. Әскери қызметті өмірлік жолына айналдырған бұл отбасы көпшілікке патриоттық тәрбиенің және жанұялық татулықтың жарқын үлгісі болып отыр.
Талдықорған қаласындағы 18404 әскери бөлімінде қызмет атқаратын 3-сыныпты сержант Ержан Нұрмұханов әскери салада 25 жылдан бері еңбек етіп келеді. Ол – десанттық-шабуылдаушы әскерінің тәжірибелі маманы. Әскери өмірдің жауапкершілігі мен тәртібін жастайынан бойына сіңірген ол бүгінде әріптестері арасында сыйлы азаматтың бірі.
Ержан кеудесіне тағылған әр медаль мен төсбелгіні ерекше қадірлейді. Себебі олардың әрқайсысында жылдар бойғы адал еңбек пен ерлік жатыр. Әскери қызмет барысында ол осы күнге дейін 154 рет парашютпен секіріп, 800 метр биіктікті бағындырған. Бұл – үлкен батылдық пен кәсіби шеберлікті талап ететін жауапты міндет.
Өмірлік жары Үміт Оразова да әскери қызметтің қыр-сырын жетік меңгерген маман. Кіші сержант шеніндегі Үміт 19 жылдан бері әуе-десанттық дайындық бөлімінде аға маман болып қызмет етеді. Ол әскери бұйрықтарды дайындау, құжаттар мен талдау жұмыстарын жүргізумен айналысады.
– Бала күнінде әскери қызметкер болуды армандамағанмын. Бірақ арнайы форманы киюге қатты қызығушылығым болатын. Уақыт өте келе бұл қызығушылық өмірлік мамандығыма айналып, бүгінде әскери саладағы мамандардың қатарынан көрініп отырмын, – дейді кіші сержант Үміт Оразова.
Көпшілік әскери адам дегенде сап түзеген сарбазды немесе бұйрық беріп тұрған командирді ғана елестетеді. Алайда олардың да қарапайым өмірі, отбасысы, күнделікті тіршілігі бар. Нұрмұхановтар отбасының өмірі – осының айқын дәлелі. Бұл жанұяда әскери тәртіп пен отбасы құндылығы қатар өрілген. Сондықтан олардың шаңырағында әскери киімге, қызметке деген құрмет ерекше.
Ержан мен Үміт бүгінде 3 ұл мен 1 қыз тәрбиелеп отыр. Үлкен ұлдары студент болса, кенжелері небәрі 5 жаста, балабақшаға барады. Балалары да ата-анасының тәрбиесін көріп, Отанға деген сүйіспеншілікпен өсіп келеді. Әскери отбасында өскен ұл-қыздар тәртіпке, жауапкершілікке және елге қызмет етудің маңыздылығына ерте жастан қанығып келеді.
– Әке-шешемнің әскери қызметте жүргенін көріп өстік. Бізді кішкентайымыздан тәртіпке, жауапкершілікке үйретті. Әкемнің марапаттары мен әскери өмірі бізге әрдайым үлгі. Менде болашақта елге пайдасы тиетін азамат болғым келеді, –дейді тұңғыш үлы Әли Ержанұлы
Нұрмұхановтар секілді ел тыныштығы үшін қызмет етіп жүрген жанұялар мемлекетіміздің мықты негізі. Олар тек әскери салада ғана емес, отбасы құндылықтарын сақтап, жас ұрпаққа патриоттық тәрбие беруде де үлгі бола алады.
Жетісу гарнизонының баспасөз қызметі
