1 маусым – Халықаралық балаларды қорғау күніне орай «Lolo Land» ойын-сауық кешенінде ерекше күтімді қажет ететін және мүгедектігі бар балаларға арналған «Ғажайып әлем» атты мерекелік шара өтті.
Талдықорған қалалық жұмыспен қамтуды үйлестіру және әлеуметтік бағдарламалар бөлімі ұйымдастырған шара облыс орталығының бірнеше жерінде өтті. Сонымен қатар, орталық саябақта балаларға көтеріңкі көңіл-күй сыйлау мақсатында ойын-сауық шарасын өткізу жоспарланған.
Мерекелік шараға арнайы барып, бүлдіршіндерді мерекемен құттықтаған қала әкімі Ернат Бәзіл тұлымды ұлдар мен бұрымды қыздардың денсаулығы зор болуына, таршылық көрмей өсуіне тілектестігін білдіріп, өскелең ұрпаққа жергілікті билік тарапынан барлық жағдай жасалатынын айтты. Келушілерге мерекелік көңіл-күй сыйлап, ойын ойнатылған «Lolo Land» ойын-сауық кешенінде дәмді дастарқан жайылды.
Кішкентай Айғанымның анасы Айжан Тұманчинова ерекше қажеттілігі бар балаларға қуанышты көңіл-күй сыйлаған ойын-сауық кешенінің басшылығына ризашылық білдірді.
Ерекше қажеттілігі бар балалардың қоғамда өз орнын табуына көмектесу мақсатында өткізілген іс-шара балалардың рухани дамуына ықпал жасап, олардың қоғамның толыққанды бір мүшесі екенін сезінуіне мүмкіндік береді.
Гүлжан ТҰРСЫН
Талдықорған қаласы
