1 мамыр – Қазақстан үшін маңызды мерекелердің бірі. Бұл күн еліміздің барлық өңірінде аталып өтіп, елдегі түрлі этностар арасындағы достық пен өзара құрметті нығайтуды көздейді.
«Бірлік болмай, тірлік болмас» деген халық даналығын ту еткен еліміз үшін бұл мерекенің мәні зор. Көпұлтты мемлекет ретінде Қазақстан әрқашан татулық пен тұрақтылықты басты құндылық ретінде бағалайды. «Береке бастауы – бірлік, ел іші – тату тірлік» деген қағиданы берік ұстанған ел халқы ынтымақ пен өзара түсіністікті дәріптейді.
Атаулы күні жыл сайын 130-дан астам ұлт пен ұлыс өкілдері бір шаңырақ астында бейбіт өмір сүріп жатқанын айшықтайтын түрлі іс-шаралармен атап өтеді. Бүкіл ел аумағында ұйымдастырылатын патриоттық шерулер мен мәдени бағдарламалар – этносаралық татулықтың көрінісі.
Осыған орай, бүгін 5571 әскери бөлімінде “Тіл – достықтың кілті, ынтымақтастықтың бастауы” атты мерекелік шара өтті. Әскери қызметшілер мен түрлі ұлт өкілдері өз өнерлерін көрсетіп, ұлттық тағамдармен бөлісті. Бұл шара жеке құрамға әр ұлттың мәдениетін жақынырақ тануға мүмкіндік берді.
Мереке соңында белсенді қатысушылар бөлім командирінің атынан алғыс хаттармен марапатталды. Іс-шара әскери бөлімдегі достық пен бірлікті нығайтудың жарқын үлгісіне айналды.
«Жетісу-Ақпарат»
