Құрметті соғыс ардагерлері мен тыл еңбеккерлері!
Қадірлі Отан қорғаушылар!
Ұлы Жеңістің 80 жылдығы мен Отан қорғаушылар күніне орай шынайы құттықтауымды қабыл алыңыздар!
Бұл екі маңызды мерекенің күнтізбеде қатарласа келуінің өзіндік терең мәні бар. Бұл даңқты жауынгерлік дәстүрдегі ұрпақтар сабақтастығын айғақтайды, өйткені Отанды қорғау – әрбір азаматтың қастерлі парызы.
Ұлы Отан соғысындағы Жеңістің 80 жылдығын мерекелей отырып, біз майдан даласында ерлікпен қаза тапқандардың рухына тағзым етеміз, тылда тынымсыз тер төккен еңбек ардагерлеріне құрмет көрсетеміз, олардың ашық аспан, бейбіт өмір сыйлаған қайсарлығына бас иеміз.
Қаншама жыл өтсе де бұл қастерлі күн бірлік пен батырлықтың, қайсарлық пен қаһармандықтың символы болып қала бермек. Өйткені елжандылық, табандылық, Отан алдындағы борышқа деген адалдық – баршамыз үшін қашанда өлмес өнеге, өшпес үлгі. Бұл туралы Мемлекет басшысы Қасым-Жомарт Тоқаев «Соғыста қаза тапқандарды ұмытпай, қаһарман ерлеріміздің рухына тағзым ету, ел ішінде бейбітшілік пен тыныштықты сақтау – баршаға ортақ парызымыз» деген болатын.
Ел мүддесі жолында қалтқысыз қызмет ете жүріп, Отан қорғаушылардың жаңа буыны біздің басты құндылығымыз – бейбітшілік пен тыныштықты қырағылықпен күзетуде. Біздің жауынгерлік дайындығы жоғары, мобильді, кәсіби армиямыз бүгінде тәуелсіз еліміздің аумақтық тұтастығы мен ұлттық қауіпсіздігін қамтамасыз етумен қатар аға ұрпақтың ерлікке толы шежіресіне негізделген батырлық мектебі болып отырғаны анық.
Құрметті жерлестер! Мамыр мерекелері қарсаңында баршаңызға зор денсаулық, толайым табыс, берекелі ғұмыр, бақыт пен шаттық тілеймін.
Еліміз әрдайым бейбітшілік бесігінде тербеліп, гүлденіп-көркейе берсін!
