21 наурыз – ынтымақтастық күні. Яғни, бұл күні адамдар бір-біріне құрмет көрсетіп, бейбітшілік пен бірліктің қадірін арттыра жүргендері абзал. Осы орайда Талдықорғанда «Наурыз-керуені» мерекелік жиыны ұйымдастырылды. Орталық алаңнан басталған керуен Назарбаев даңғылымен жылжып, «Жастар» саябағына дейін жүріп өтті. Облыс орталығындағы шеруге 1200-ге жуық түрлі сала өкілдері ұлттық киімде қатысты.
Орталық алаңда Д. Рақышев атындағы филармониясының М. Төлебаев атындағы халық аспаптар оркестрі ұлттық әуендерді әуелетті. Өнерпаздар керуенді салтанатпен атандырды.
Көш керуен құрамынан мәдениет қызметкерлері, зиялы қауым өкілдері, еңбек ардагерлері, жұмысшы мамандықтар иелері, спортшылар, этномәдени және жастар бірлестіктері, еңбек ұжымдары, әр саладағы басқарма қызметкерлері, мен мекеме қызметкерлері төбе көрсетті.
Түйедегі абыз қарт, сауыт киіп, атқа мінген батырлар, қолына құс қондырған құсбегілер, тазысын ерткен аңшылар, арбаға ат жеккендер мен велоспортшылар шерудің көркін кіргізді. Сал-серілер көш бойы ән шырқап, күй тартты. Жастар саябағында ақ жаулықты аналар керуенді шашу шашып қарсы алды.
Бүгін бір мезетте аудан, қалалармен қоса алғанда Наурыз керуен жүріп өтеді, облыс бойынша 3000 адам мерекелік көңіл-күймен шеру жасайды. Аудан, қалалардың орталықтарындғы Наурыз көш керуені телемарафоны тікелей эфир арқылы қосылады.
Мерекелік жиын әрменқарай концерттік бағдарламамен жалғасты.
Айта кетейік, биыл елімізде Ұлыстың ұлы күні 10 күн бойы тойланады. Өткен жылдан бері жаңа форматтағы Әз-Наурыз ұлттық мейрамын 14 наурыз – Көрісу, яғни Амал мерекесімен басталды. 15 наурыз – Қайырымдылық, 16 наурыз – Мәдениет және ұлттық салт-дәстүр, 17 наурыз – Шаңырақ, 18 наурыз – Ұлттық киім, 19 наурыз – Жаңару күні ретінде белгіленген болатын. Осы күні көктемгі ағаш егу дәстүрін жалғастыру ұсынылды. Ал 20 наурыз – Ұлттық спортқа арналып отыр. Бүгінгі яғни 21 наурыз – Ынтымақ, ал ертең өтетін 22 наурыз жалпы халқымыз ерекше тойлайтын – Жыл басы. Бұл күні еліміздің барлық өңірлерінде жалпыхалықтық мәдени-спорттық іс-шаралар өтеді. 23 наурыз – Тазару күнімен мереке қортындыланбақ.
Медет ЖҰМАБАЙ
Фото: Дмитрий Ерофеев
