Дала еңбеккерлері қазір «егін майданында» жүр. «Көктемнің бір күні жылға азық» деген бар. Бүгінде Ескелді ауданына қарасты Қаратал ауылдық округінде егін егудің соңғы қадамдары жасалуда. «Райманов» шаруа қожалығы қазір жүгері егуде. Бұл жүгері мал азығына, оның ішінде сүрлемге бағытталмақ.
Анатолий Мищенка табан ауыстырмай осында 14 жылдан бері еңбек етуде. Қазірдің өзінде қожалық 25 гектарға бидай, 23 гектарға дән бағытындағы жүгері, 30 гектарға арпа, 13 гектарға соя еккен. Оған көпжылдық 15 гектар жоңышқаны қосыңыз. 25 гектар сүрлемге шабылатын жүгері тағы бар.
– Шаруа қожалық өзін-өзі қамтамасыз етіп отырған бірден-бір құрылым. Егін шаруашылығы мен мал шаруашылығын қатар қолға алып отырмыз. 50 сауын сиыр, 120 бас бойдақ мүйізді ірі қара, бір отар қой, 10 шақты жылқы мен құс өсіреміз. Оған қажетті жемшөпті өзіміз егіп, өзіміз жинаймыз. Қожалықта 4 адам еңбек етеді, – дейді Анатолий Мищенка.
Көктем күтпеген жерден біртүрлі мінез танытып тұрғанын да жасырмады дала еңбеккерлері. Күн кенеттен ысып, топырақ құрғап тұрғаны шымбайға бататынын жеткізді де. Алайда бірер күнде жауын жауатыны көңілге медет сыйлайтынын да айтты. Өйткені, көктемгі егістің өніп шығуы үшін жаңбыр аса қажет. Дейтұрғанмен, қожалық өкілдері егіннің биыл бітік боларына сенімді. Өйткені, алқапқа диқандар маңдай терін төкті.
– Бізде 4 трактор, 2 жүк көлігі бар. Егінді өз күшімізбен егеміз де, жинауға арнайы техниканы жалдаймыз. Қазір жоспарда тракторларымызды жаңалау тұр. Кейін комбайн алуға да тырысамыз. Бәрі егіннің мол өнім беруімен байланысты. Дейтұрғанмен, маңдай терімізді сылып еңбектенудеміз, – дейді Анатолий Мищенка.
«Райманов» шаруа қожалығы жұмысшыларға 250-300 мың теңге аралығында жалақы төлеп отыр. Қазір бұл саладағы жоғары жалақы десек болғандай. Осындай қолдаудан соң шаруалар да аянып жатқан жоқ.
Дастанбек САДЫҚ
Ескелді ауданы
