Кеген ауылында тұратын Арай Нұрбайқызы – білімді, іскер, жігерлі жастардың бірі. Т. Рысқұлов атындағы Қазақ экономикалық университетін бітіріп, еңбек жолын аудандық әкімдікте, кіріс басқармасында бастаған.
Биылғы Жастар жылы Арай үшін жаман болған жоқ. Ойлаған ойы орындалып, халыққа қызмет етер бір игілікті істің басын бастады. Ол аудандық жұмыспен қамту орталығы арқылы кәсіпкерлікпен айналысуды жөн көрді. Осылайша нәтижелі жұмыспен қамтуды және жаппай кәсіпкерлікті дамытудың 2017–2021 жылдарға арналған «Еңбек» мемлекеттік бағдарламасына сәйкес «Атамекен» Ұлттық кәсіпкерлер палатасының қаржылай емес қолдау операторы ретінде ұйымдастырылған «Бастау-Бизнес» кәсіпкерлік негіздерін оқыту курсын бітірді.
Сөйтіп, «Жас кәсіпкер» жобасы бойынша арнайы сертификатқа ие болды. Одан кейін бизнес жобасын жасап, облыс әкімінің грантына қатысты. Жолы болып, жеңімпаз атанып, облыс әкімінің 500 мың теңге грантын алды.
Көп уақыт өтпей Кеген ауылындағы «Қуат» кафесінің бірінші қабатынан сұлулық салонын ашты. Мұнда қыз-келіншектердің қазіргі уақыт талабына сай сәнденіп, әрленуіне қажетті барлық қызмет түрлері көрсетіледі. Біз Арайдың бастаған ісіне сәттілік тіледік.
Қанат БІРЖАНСАЛ,
Кеген ауданы
