Облыста Конституцияның жаңа жобасын түсіндіру және қоғаммен ашық пікір алмасу бағытындағы жұмыстар жүйелі түрде жалғасуда. Осы орайда Көксу ауданындағы «Көксу қант зауыты» ЖШС аумағында «Конституциялық реформа: қоғамдық диалог» атты кездесу өтті.
Кездесу барысында Көксу аудандық «АMANAT» партиясы филиалының төрағасы Мәлік Бейсенов жаңа Конституция жобасының маңыздылығына тоқталды.
– Конституцияның жаңа жобасы – мемлекеттің болашақ даму бағытын айқындайтын маңызды құжат. Ондағы өзгерістер адам құқықтарын қорғауға, билік пен қоғам арасындағы жауапкершілікті арттыруға, әділетті басқару қағидаттарын нығайтуға бағытталған. Мұндай құжатты талқылау тек мамандар арасында емес, қарапайым еңбек адамдарының қатысуымен өтуі тиіс. Себебі Конституция – әр азаматтың өміріне тікелей әсер ететін негізгі заң, – деді ол.
Өз кезегінде Көксу аудандық мәслихаттың депутаты Әйгерім Түстікбаева сөз сөйлеп, жаңа жобаның жергілікті деңгейдегі маңызына назар аударды.
– Қоғамның сұранысына жауап беретін, халықтың пікірі ескерілген Конституцияның жаңа жобасында әлеуметтік әділеттілік, азаматтардың құқықтарын қорғау және жергілікті басқаруды күшейту мәселелері айқын көрініс тапқан. Мұндай реформаларды еңбек ұжымдарында ашық талқылау – халық пен билік арасындағы сенімді нығайтудың тиімді жолы, – деді депутат.
Кездесуге қатысқан зауыт қызметкерлері де өз пікірін білдірді. Соның ішінде «Көксу қант зауытының» жұмысшысы Марат Садиев Конституцияның қарапайым азаматтар үшін маңызын атап өтті.
– Біз үшін Конституция – тек заң мәтіні емес, күнделікті еңбегіміз бен әлеуметтік жағдайымызға әсер ететін негізгі құжат. Осындай кездесулер арқылы өз пікірімізді ашық айтуға мүмкіндік беріліп отырғаны қуантады. Әлеуметтік кепілдіктер мен еңбек құқығының сақталуы біз үшін өте маңызды, – деді ол.
Айта кетейік, «Көксу қант зауыты» ЖШС өңірдегі ірі өндірістік кәсіпорынның бірі. Кәсіпорын жылына 200-230 мың тонна қант қызылшасын өңдеп, 25 мың тоннаға дейін шекер алады. Өндіріс маусымында зауытта 420-450 адам жұмыспен қамтылады. Шикізат Көксу, Қаратал, Ескелді, Кербұлақ аудандарынан және Талдықорған қаласынан жеткізіледі. Өткен жылы зауыттың өндірістік қуаты жаңғыртылып, еңбек өнімділігі артты.
Кездесу соңында қатысушылар мұндай ашық диалог алаңдарының қоғамдағы реформаларды түсіндіруде және азаматтардың құқықтық сауаттылығын арттыруда маңызды екенін атап өтті. Конституцияның жаңа жобасын халыққа кеңінен түсіндіру бағытындағы жұмыстар алдағы уақытта да жалғасатыны айтылды.
Қажет Андас
