Талдықорғанда толыстағы офицерлердің қатысуымен «Қалқан – 2024» арнайы тактикалық оқу-жаттығуының бірінші кезеңі өтті. Облыс бойынша жыл сайынғы міндетті әскери науқанға толыстағы 135 офицер шақырылды.
10 күн қолдарына қайта қару алып, тактикалық оқу-жаттығуға шыққан толыстағы офицерлер ұрыс даласында қалай қорғану, шабуылдау керектігін, қоян-қолтық ұрыс түрлерін көрсетті. Олардың іс-әрекеттерінде қазіргі заманғы қарулы қақтығыстардың тәжірибесі кеңінен қолданылды. Арнайы тактикалық жаттығуда тегеурінді техника сыналып, сарбаздар содырларға соққы беруге сақадай сай екенін айқындады. Жиынға қатысушылар арнайы формамен, азық-түлік және медициналық қызметпен қамтамасыз етілді. Заң бойынша оқу-жаттығуға қатысқандардың жұмысы сақталып, әскери қызметте болғаны үшін арнайы жалақы тағайындалады.
Шара барысында облыстық жұмылдыру дайындығы басқармасының басшысы Айдар Кибаев:
– 5-14 тамыз аралығындағы оқу-жаттығудың бірінші кезеңі Талдықорған қаласының аумағында өтті. Оқу-жаттығуды өткізу жоспарына сәйкес стратегиялық объектілерді күзету және қорғау, жауынгерлік міндеттерді орындау бойынша арнайы тактикалар пысықталды. Офицерлер, сіздердің үйлесімді әрекеттеріңіздің, бригаданы шебер басқаруларыңыздың арқасында міндеттер пысықталып, алға қойған мақсаттар орындалды. Аумақтық қорғаныс бригадасын Алакөл ауданында оқу-жаттығуды осындай лайықты деңгейде өткізуге шақырамын, – деді.
Облыстық қорғаныс бригадасының бастығы Бағлан Шегібаев: «Біздің бригадаға десанттық шабуылдаушылар кіреді. Мұнда толыстағы барлық офицерлер жиналды. Олар арнайы жаттығудан өтіп тұрады. Жиын барысында күзет ротасы жинақталып, аумақты қалай қорғау керек, диверсиялық топтармен күрес жүргізу тәсілдерін пысықтады», – деді.
Оқу-жаттығу аяқталғаннан кейін облыстық жұмылдыру дайындығы басқармасының басшысы әскери оқу-жаттығуды сәтті өткізуімен құттықтап, үздіктерді марапаттады.
Айта кетейік, «Қалқан – 2024» арнайы тактикалық оқу-жаттығуының екінші кезеңі 21-30 тамыз аралығында Алакөл ауданы Үшарал қаласында өткізіледі. Оған толыстағы 100 офицер, сержант, сарбаз қатысады.
Айдар ҚАЛИЕВ
