Нотариустың атқарушылық жазбасы арқылы борышкерден ақшасын немесе қарыз сомасын өндіріп алу жайында не білесіз? Толығырақ төменде:
Атқарушылық жазба дегеніміз не? Атқарушылық жазба дегеніміз, жалпы ұғымы – ол Қазақстан Республикасының «Нотариат туралы» Заңына тек 01.01.2016 жылдан бастап қолданысқа енгізілген жекеше нотариустарымен жасалатын нотариалдық жазба.
Бұл дегеніміз — Қазақстан Республикасының «Нотариат туралы» Заңында көрсетілгендей, Борышкерден ақшаны өндіріп алу немесе өзге де жылжымалы мүлікті талап ету үшін нотариус тиісті белгі қойылатын, берешекті белгілейтін түп нұсқа құжат көрсетілген кезде бірыңғай нотариаттық ақпараттық жүйе арқылы электрондық түрде атқарушылық жазба, жалпақ тілмен айтқанда яғни Нотариуспен жасалған атқарушылық жазба негізінде борышкерден өзіне тиесілі қарыз суммаларын өндіріп алуы.
Атқарушылық жазбалардың басым бөлігі шағын қаржы ұйымдары, екінші дәрежелі банктер және Пәтерлер меншік иелерінің тұтынушылары кооперативінің кондоминиум объектілерінің ортақ мүлкін күтіп – ұстауғаміндетті шығыстарға қатысуға жалтаратын, үй-жайлар (пәтерлер) меншік иелерінен берешекті өндіріп алу туралы міндеттеме бойынша берешекті өндіріп алу үшін, сонымен қатар жеке және заңды тұлғалардың өздеріне тиесілі қарыз соммаларын өндіріп алу үшін жасалады.
Атқарушылық жазба қалай жасалады, оның шарттары? Атқарушылық жазба:
- егер Нотариусқа атқарушылық жазба жасауға ұсынылған құжаттар берешектің немесе борышкердің өндіріп алушы алдындағы өзге де жауапкершілігінің даусыз екендігі расталса;
- Егер талап қою (арыз) құқығы туындаған күннен бастап, яғни, қарыз алған күннен бастап үш жылдан аспайтын уақыт өтсе жасалады.
- Егер атқарушылық жазба берілетін талап үшін Қазақстан Республикасының заңнамасында өзге ескеру мерзімі белгіленбесе, атқарушылық жазба осы мерзім шегінде беріледі. Сонымен қатар, шартта өзге мекенжай көрсетілмесе, борышкердің (жеке тұлғаның) тіркелген жері не тұрғылықты жері бойынша, ал заңды тұлға борышкер болып табылған жағдайда, онда оның тіркелген жері не оның тұрақты жұмыс істейтін органының тұрған жері бойынша жасалады.
Қазақстан Республикасының әртүрлі өңірлерінде тұратын немесе тіркелген ортақтас борышкерлерге қатысты атқарушылық жазба өндіріп алушының таңдауымен борышкерлердің бірінің мекен-жайы бойынша жасалады.
Аталған талаптар бойынша атқарушылық жазбаны нотариус оның үй-жайы орналасқан жеріне сәйкес нотариаттық палатамен айқындалған оның қызмет ету аумағы бойынша жасайды.
Жасалған атқарушылық жазбаның мазмұны, онда заңмен белгіленген тәртіппен не көрсетілу қажет? Атқарушылық жазбада:
1.Атқарушылық жазбаны жасаған нотариустың тегі және аты-жөні, лауазымы көрсетілуі қажет.
2.Өндіріп алушының атауы, оның туған күні, тұрғылықты жері немесе орналасқан жері, жеке сәйкестендіру нөмірі, заңды тұлғаның деректемелері, бизнес-сәйкестендіру нөмірі болуы қажет.
3.Борышкердің атауы, оның туған күні, тұрғылықты жері немесе орналасқан жері, жеке сәйкестендіру нөмірі (егер ол арыз берушіге белгілі болса), заңды тұлғаның деректемелері, бизнес-сәйкестендіру нөмірі көрсетілуі қажет.
4.Өндіріп алу жүргізіліп отырған мерзімі көрсетілуі керек.
5.Өндіріп алынуға жататын соманың немесе талап етілуге жататын нәрселер көрсетілуі тиіс.
6.Өндіріп алушы төлеген мемлекеттік баж сомасының немесе жекеше нотариустың нотариаттық әрекеттеріне төленген соманың көрсетілуі қажет.
7.Атқарушылық жазба жасалған уақыты (жыл, ай, күн);
8.Атқарушылық жазбаның тізілімде тіркелген нөмірі;
9.Атқарушылық жазбаны жасаған нотариустың қолтаңбасы мен мөрінің бедері;
10.Атқарушылық жазбаның күшін жою туралы өтінішті беру мерзімі мен тәртібі қамтылуға тиіс.
Атқарушылық жазбаның күшін жою және оған дау айту ережесі. Атқарушылық жазбаны алғаннан кейін, жасалған атқарушылық жазбамен келіспеген жағдайда, он жұмыс күн ішіндеНотариусқа атқарушылық жазбамен келіспейтіндігі туралы себебін көрсете отырып,қарсылық арыз жолдау қажет.
Бұл ретте Нотариус мәлімделген талапқа қарсы қарсылықты алған күннен бастап үш жұмыс күнінен кешіктірмей атқарушылық жазбаның күшін жою туралы қаулы шығарады.
Атқарушылық жазбаның күшін жою туралы қаулы дау айтуға жатпайды.
Атқарушылық жазбаның күшін жою туралы қаулының көшірмесі шығарылған күнінен кейінгі келесі жұмыс күнінен кешіктірілмей өндіріп алушыға, борышкерге жіберіледі.
Егер жасалған атқарушылық жазба борышкердің қарсылығы бойынша нотариустың қаулысымен күшін жоймаса, оған дау айту сот тәртібімен жүзеге асырылады.
«ЖЕТІСУ-АҚПАРАТ»
