Жыл басынан бері облыста 190 өрт оқиғасы орын алды. Бұл былтырғы жылмен салыстырғанда 2 есеге аз. Төтенше жағдай көбіне жылыту маусымы кезеңінде орын алады. Себебі, тұрғындардың қауіпсіздік ережелерін сақтамауы, жеке тұрғын үйлерде дұрыс салынбаған жылу пештерінің ақаулығы. Қыстың қамын жазда ойлаған ТЖД мамандары өрттің алдын алу үшін жылыту маусымына дайындықты бастап кетті.
Былтыр әлеуметтік осал топқа жататын отбасының үйлерінде газдың қауіпті концентрациясын анықтау датчиктерін жаңартып, қосымша жарақтандыру үшін 936 датчик орнатылды. Департамент өткізген «Көмек қолы» акциясында пешті жөндеуге, түтін мұржасын тазартуға және от жағу алдындағы парақтарды орнатуға көмек көрсетілді. Қауіпсіздік ережелері бойынша көптеген шара атқарылды. Соған қарамастан, былтырғы жылыту кезеңінде 137 өрт тіркеліп, 3 адам қаза тауып, 1 адам жарақаттанғаны өкінішті.
Осыған орай 2024-2025 жылыту кезеңінде өрт қауіпсіздігін қамтамасыз ету үшін алдын алу шаралары ерте қолға алынуда. Мәселен, 15 тамыз бен 1 қазанға дейін тұрғын үй секторында өрт қауіпсіздігі айлығы өткізіледі. Бірінші кезекте әлеуметтік осал отбасылары профилактикалық іс-шаралармен қамтылмақ. Өткен жылдардағы тәжірибеге сүйене отырып, жергілікті атқарушы органдар мен халықтың әлеуметтік қорғалмаған топтарының үйлеріне улы газ және түтін анықтағыш датчиктер орнату мәселесі пысықталуда.
Айдар ҚАЛИЕВ
