Қазақстанда ішкі істер органдары қоғамдық тәртіпті қамтамасыз ету және жол-көлік оқиғаларының алдын алу бағытындағы кешенді рейдтерді күшейтті, – деп хабарлайды 7-su.kz ақпараттық порталы.
Жүйелі шаралар нәтижесінде бір апта ішінде полиция қызметкерлері жол жүрісі қағидаларын бұзудың 10 мыңға жуық фактісінің жолын кесті. Оның ішінде өзгелердің өміріне тікелей қауіп төндіріп, көлік құралын мас күйде басқарған 201 жүргізуші анықталды. Тәртіп сақшылары «ізін суытпай» бір адам өлімі қылмысын, ауыр зардаптарға әкелген үш істі, 11 тонау, 218 ұрлық, сондай-ақ жеті мал және сегіз автокөлік ұрлығын ашты. Қылмыстың жолын кесу мен азаматтардың қауіпсіздігін қамтамасыз ету басты міндеттердің бірі саналады.
Өрескел заңбұзушылықтар өңірлерде де жиі кездеседі. Түнгі уақытта Үштөбе қаласында тәртіп сақшылары Toyota Marino автокөлігін тоқтатқанда, рөлде 34 жастағы мас азаматтың отырғаны белгілі болды. Сот шешімімен ол 15 тәулікке әкімшілік қамауға алынып, жеті жылға куәлігінен айырылды. Сондай-ақ Астана, Қостанай және Шымкент қалаларында көшеде дрифт ұйымдастырып, түнгі тыныштықты бұзғандар құрықталды. Елордада Шәмші Қалдаяқов көшесінде қауіпті әрекетке барған екі жас жүргізуші 10 тәулікке қамалып, көліктері арнайы тұраққа қойылды. Қостанайда жыл басынан бері 16 рет айыппұл арқалаған жүргізуші бейнебақылау арқылы ұсталып, 15 тәулікке қамауға алынды. Шымкентте 18 жастағы Mercedes-Benz жүргізушісі де 10 тәулікке жазаланды.
Жол тәртібінен бөлек, вандализм мен заңсыз жазуларға қарсы күрес қарқынды жүргізілуде. 21 қыркүйектен бері республика бойынша 13 мыңнан астам заңсыз граффити жойылып, алты мыңнан астам әкімшілік іс қозғалды. Ең ауыр төрт факті бойынша сотқа дейінгі тергеп-тексеру басталды, оның біреуі – вандализм, үшеуі – есірткі жарнамасына қатысты. Ішкі істер министрлігі заң бұзған әрбір азаматтың жауапкершіліктен жалтара алмайтынын ескертеді.
Қоғамдық қауіпсіздікті арттыру үшін цифрлық технологиялар мен бейнебақылау камераларының мүмкіндігі кеңінен қолданылады. Бұл шаралар жол-көлік оқиғаларын азайтуға, қылмыстың алдын алуға және көшелердегі тәртіпті нығайтуға зор мүмкіндік береді. Сондай-ақ тұрғындардың құқықтық сауаттылығы мен жауапкершілігін арттыру арқылы заң үстемдігін қамтамасыз ету процесі қарқын алады. Полиция мен қоғамның тығыз байланысы қауіпсіз орта қалыптастырудың негізгі тетігі саналады.
