Қазақстанда бұдан былай айыппұл тек жол ережесін бұзған жүргізушілерге ғана емес, кез келген әкімшілік құқық бұзушылық үшін автоматты түрде жазылмақ, – деп хабарлайды 7-su.kz ақпараттық порталы.
Биылғы 12-наурыздан бастап елімізде автоматты айыппұлдардың қолдану аясы айтарлықтай кеңейеді. Заңға енгізілген өзгерістерге сәйкес, бұған дейін цифрлық тіркеу тек жылдамдық асырған немесе бағдаршамның қызыл түсіне өткендерге қатысты болса, енді ақылды жүйелер кез келген заңсыз әрекетті анықтап, айыппұлды дереу рәсімдейді.
Әкімшілік кодекстің 31-бабына сай, цифрлық технологиялар арқылы анықталған құқық бұзушылықтар бойынша арнайы хаттама толтырудың қажеті болмайды. Барлық деректер әкімшілік өндірістің бірыңғай реестрімен интеграцияланған жүйелер арқылы өңделіп, тікелей айыппұл салуға негіз болады.
Енді «автоматты режим» – камералар, дрондар мен ақылды жүйелер азаматтардың күнделікті тұрмыстағы әрекеттерін де қадағалай алады. Мәселен, адам белгіленбеген жерге қоқыс тастаса немесе аялдамада шылым шексе, жүйе оның жеке басын анықтап, айыппұлды жібереді.
Қандай құқық бұзушылықтар үшін айыппұл салынуы мүмкін:
- Көшеде қоқыс немесе темекі тұқылын тастау (2026-жылы айыппұл көлемі 43 250 теңге);
- Темекіні тыйым салынған қоғамдық орындарда шегу;
- Жолды белгіленбеген жерден кесіп өту;
- Заңсыз сауда жасау немесе алкогольді рұқсат етілмеген уақытта сату.
Бұл жаңашылдық «Сергек» секілді бақылау жүйелерінің мүмкіндіктерін арттырады. Бұрын видеожазбалар тек дәлел ретінде қолданылса, енді олар айыппұлды автоматты түрде кесуге толық құқық береді.
Мұндай жүйе әлемдік тәжірибеде, атап айтқанда Қытай мен Сингапурде кеңінен қолданылады. Онда бет-әлпетті тану технологиясы мен роботтар қоғамдық тәртіптің сақталуын мүлтіксіз қадағалайды. Қазақстан да цифрландыру арқылы көшелердегі тазалық пен қауіпсіздікті нығайтуды көздеп отыр.
