Алтын күн аспаны,
Алтын дән даласы.
Ерліктің дастаны –
Еліме қарашы!.
Шіркін, біз қандай еркін, азат елміз десеңізші?! Қазаққа осындай бақ берген Тәңірге алғыс айтудан шаршамауымыз керек.
Мемлекеттік Ту, Елтаңба және Әнұран – еркіндіктің нышаны. Көгілдір түсті Туымыз, Елтаңбамыз, Әнұранымыз бүкіл әлемге Қазақстан Республикасы аталатын тәуелсіз мемлекеттің бейнесін паш етіп тұрғанын зор мақтанышпен айтуымыз керек.
Ұлттық рәміздеріміз ұлттың бірегейлігі мен ұлылығын көрсетеді. Мемлекеттік рәміздерді қастерлеу, қасиетін білу, оны жүрекке тоқу – отансүйгіштіктің белгісі деп білемін. Еліміздің жастары, өскелең ұрпақ патриот болсын десек, олардың бойына жастайынан осындай ұғымды сіңіруіміз қажет.
Қай елде болмасын мемлекеттік рәміздер тәуелсіздік нышаны ретінде ерекше қадірленіп, оларға биік мәртебе беріледі. Сол үшін де әрбір азамат «Мемлекеттік рәмізді қастерлеу басты парызым» деп білуі қажет. Мемлекеттік рәміздерді қадірлеу арқылы біз жас ұрпақты отансүйгіштікке тәрбиелейміз. Қасиетті қазақ жерінде дүниеге келген баланың бойындағы еліне, жеріне, Отанына деген құрметті асыру үшін отбасында ата-анасы, мектепте ұстазы Рәміздерді құрметтеп, қастерлеуді үйретуге міндетті. Себебі, осы арқылы мемлекет мәртебесін асқақтатып, туған жердің тұғырын биіктетеміз.
Мемлекеттік рәміздер ұлттық бірегейліктің қалыптасу тірегі және әрбір мемлекеттің дамуының ажырамас бір бөлігі екенін ұмытпайық. Мемлекеттік рәміздердің мәртебесі әрқашан биік, елдігіміз мәңгі болса екен деп тілеймін.
Шыңғыс ОРЫНБАСАРОВ,
Мұсабек атындағы орта мектептің тарих пәні мұғалімі
Көксу ауданы
