Қай уақытта болмасын кеден болған жерде заңбұзушылық болатыны анық. Ал бұндай тәртіпсіздіктер тиісінше үнемі қадағалаумен ғана тыйылады деген сөз. Ал аталған мәселе бойынша халықты ақпараттандырып отыру да өзекті дүние деуге болады. Ендеше біз осы мақсатта материалымызды назарларыңызға ұсынамыз.
Тиым салынған дәрілер тәркіленді
26 мамыр күні 17 сағат 20 минут мөлшерінде Жетісу облысы бойынша мемлекеттік кірістер департаменті Шекара маңы халықаралық ынтымақтастығы орталығы «Қорғас» кеден бекетінде кезекті кедендік тексеру кезінде Х. есімді Қазақстан азаматынан кедендік тексеруден жасырылған 83 қаптама (бір қаптамады 50 дана) дәрі-дәрмек тәркіленді.
Қазіргі уақытта аталмыш фактілер бойынша алынған дәрілердің химиялық құрамын анықтау мақсатында сараптамаға жіберу және әкімшілік-құқықтық жауапкершілікке тарту мәселелсі қарастырылуда.
Темекі тығамын деп торға түсті
Бүгінде шекара маңы халықаралық ынтымақтастық орталығы «Қорғас» кеден бекеті арқылы тауар тасушылардың ішінде акциздік тауарлар құрамына жататын темекі өнімдерін тасушылар саны азаймауда. Сондай-ақ, бұндай тауар тасушылардың барлығы заңсыз түрде алып өтуге тырысады.
Себебі, заңды түрде кедендік ресімдеуден өтетін болса, оның өзіндік құны (қосымша құн салығы, акциз және кедендік алымды қосқанда) бірнеше есеге артатыны белгілі.
Атап айтсақ, жыл басынан бері аталмыш кеден бекеті рақылы кеден заңын бұзу арқылы темекі өнімдерін алып өтудың сегіз фактісі тіркелді. Ал үстіміздегі жылдың 25 мамыры күні сағат 15-те мемлекеттік нөмірі 879 AG ГРНЗ жеңіл автокөлігін кедендік тексеру кезінде көліктің ішінен «OSCAR», «ESSE» маркалы 2161 блок темекі өнімдері табылды.
Бұдан бөлек, 25 күні тағы да кезекті кедендік тексеру кезінде М. есімді Қазақстан азаматынан кедендік тексеруден жасырылған «MILANO», «MAC» маркалы 205 блок темекі өнімдері алынды.
Қазіргі уақытта аталмыш фактілер бойынша кеден заңын бұзушыларды әкімшілік-құқықтық жауапкершілікке тарту мәселесі қарастырылуда.
Валюта тәртібін бұзушылар бар
Бүгінгі күні кеден тәртібін бұзудың кең таралған түріне заңсыз валюта алып өту фактілері жатады. Мысалы, былтырдың төрт айы ішінде ШХЫО арқылы өтетін турист пен жолаушылардан заңсыз валюта алып өтудың 17 фактісі тіркелді. Нәтижесінде 90 миллион теңге, 850 мың ресей рублі, 35530 АҚШ доллары тәркіленді.
Бұндай заңсыздық бұнымен шектелмейді. Үстіміздегі жылдың 25 мамыры күні жолаушылар терминалында кезекті кедендік тексеру кезінде екі Қазақстан азаматынан кедендік тексеруден жасырылған 11 019 500 теңге табылды.
Ал кеден заңы бойынша валюта алып өту тәртібі бір адамға сол күнгі доллардың бағамы бойынша 10 мың доллардан аспауы керек. Екі азамат та кеден заңын бұзғаны үшін Қазақстан Республикасы Әкімшілік-құқық бұзу кодексінің 551 баптары бойынша әкімшілік жауапкершілікке тартылып, айыппұл салынды.
Ұялы телефонмен ұятқа қалды
Жалпы, кеден заңын бұзушылардың ішінде ер адамдармен қатар әйел адамдардың да саны аз емес. Өткен жылдың төрт айының қорытындысы бойынша әшкереленген әкімшілік-құқық бұзу фактілерінің ішінде әйел адамдардың сандары басым екені байқалады.
Мәселен, 25 мамыр күні 18 сағат 45 минутта жолаушылар терминалындағы кезекті кедендік тексеру кезінде Р. есімді Қазақстан азаматшасынан кедендік тексеруден жасырылған 25 дана «REDMI» маркалы ұялы телефон алынды.
Кеден заңы бойынша ұялы телефондар алып өтуге шектеу қойылған (айына екі дана ғана ұялы телефон алып өтуге рұқсат) тауарлар тізіміне жатады. Қазіргі уақытта ұсталған телефондардың кедеднік құнын анықтау, тиісті шешім шығару және әкімшілік-құқықтық жауапкершілікке тарту мәселесін шешу үшін уақытша сақтау қоймасына қойылды.
Жетісу облысы бойынша мемлекеттік кірістер департаменті
шекара маңы халықаралық ынтымақтастығы орталығы
“Қорғас” кеден бекетінің баспасөз қызметі
