Елімізде құмар ойынның «құлдығында» жүрген қанша адам бар. Лудомания дерті қоғамда түрлі әлеуметтік мәселелерді туындатуда. Қанша жерден дабыл көтергенмен осы індетке тосқауыл табылмай отыр. Оған себеп те жоқ емес. Мәселен, Жетісу өңірінде заңсыз казино ұйымдастырған шетелдіктер ұсталды. Облыстық экономикалық тергеп-тексеру департаменті анықтапты. Сұмпайылар құйтырқы ойынды «Қорғас» ХШЫО-да ұйымдастырған. Күштік құрылымдар бірігіп 6 заңсыз ойын алаңын анықтаған. «Айқабы» бұл емес, сол маңда жезөкшелік притон да құмар ойынға келушілерге қызмет көрсеткен. Дені, дені емес, бәрі қазақтың қаракөздері. Жетісу облысы бойынша экономикалық тергеп-тексеру департаментінің аса маңызды істер жөніндегі жедел уәкілі Ербол Құрманбаевтың айтуы солай.
«Қорғас» ХШЫО аты айтып тұрғандай халық- аралық орталық. Бұл маңда ҚХР-дің де, Қазақстанның да нысандары қызмет етуде. Әлгі жасырын құмар ойынды ұйымдастырушылар қазақстандық ғимараттарда орналасқан. Көптің көзіне түспес үшін өз қызметін түнгі уақытта ұсынған. Заңсыз ойынханаға көрші елдің азаматтары келеді екен. Онда да кез келген адамға қызмет көрсетпеген. Ойынханаларға ғимарат ішіндегі жасырын есіктен кіргізілетін болған. Ал әлгі притон ҚХР-дің қалтасы қалың құмар ойыншыларына қызмет көрсеткен.
– Жүргізілген тінту іс-шараларының нәтижесінде 76 ойын автоматы, 43 ойын үстелі, құмар ойындарды ұйымдастыруға қажетті көптеген техникалық жабдық, сондай-ақ, 60 мыңнан астам қытай ақшасы тәркіленді. Қазір сотқа дейінгі тергеу жұмыстары жүргізілуде. Тергеу мүддесіне сай ақпараттар таратылмайды. Сонымен қатар, Конституцияның 77-бабы 3-тармағының 1-тармақшасына және ҚР ҚПК 19-бабының 1-бөлігіне сәйкес қылмыстық құқықбұзушылық жасаудағы кінәсі соттың заңды күшіне енген үкімімен белгіленгенге дейін әрқайсысы кінәсіз деп есептеледі, – дейді Ербол Құрманбаев.
Өңірімізде заңсыз лоторея ұйымдастырып жүргендер де бар екен. Өткен 4 айда әлеуметтік желі арқылы заңсыз ойынды жарнамалап жүрген 2 тұрғын анықталыпты. Негізі мұндай пиғылдағы азаматтарға 100 АЕК көлемінде айыппұл салынуы тиіс екен. Облыстық экономикалық тергеп-тексеру департаментінің аса маңызды істер жөніндегі жедел уәкілі Ербол Құрманбаевтың айтуынша, заңсыз әрекетін һәм өз кінәсін мойындағаны үшін сот 70 АЕК көлемінде айыппұл тағайындапты. Егер осы екі тұлға қарекетін қайталаса 200 АЕК көлемінде айыппұл арқалайды.
Жыл басталғалы өңірімізде заңсыз ойындарға, лотореяға үгіттеген 1200 контент анықталыпты. Олардың бәрі қазір бұғаттаулы. Сонымен қатар іnstagram желісінде заңсыз лотореялық ұтыс ойындарын ұйымдастырған 10-нан аса дерек тіркелген. Бүгінде бұл жайларға байланысты хаттамалар әзірленуде екен.
Дастанбек САДЫҚ
Фото: ontustiktv.kz
