Жетісу облысында «Халық заңгері» жалпы республикалық акциясы аясында арнайы іс-шара өтті. Талдықорғандағы облыстық кәсіпкерлер палатасында өткен шараның басты мақсаты – халықтың құқықтық сауаттылығын арттыру арқылы әлеуметтік шиеленісті жою, мәселелерді шешу және азаматтарға тегін заңгерлік көмек көрсету.
Шараға облыс әкімінің орынбасарлары, құқық қорғау, мемлекеттік және жергілікті атқарушы органдарының жауаптылары, сондай-ақ үздік заңгерлер мен білікті адвокаттар арнайы шақырылып, жергілікті тұрғындар қатысты. Бұл жолғы азаматтарды қабылдау да 100-ге жуық азамат тегін заңгерлік кеңес алды. Мамандармен сөйлескеннен кейін өңір тұрғындары өз мәселесін шешуді заңды жолдарын ұғып практикалық мәні зор және жақын арада іске асырылатын шын мәнінде сауатты консультация алғанын жеткізді.
– «Осындай акцияларды өткізу болашақта жақсы дәстүрге айналғанын қалаймын. Өйткені, әркімнің кеңес алу үшін адвокатқа жүгінуге немесе бірден бірнеше мемлекеттік билік органдарының өкілдерімен бір алаң аясында жүздесуге қаржылық мүмкіндігі жоқ», – деді Талдықорған қаласының тұрғыны Майра Қапанова.
Ұйымдастырушылардың сөзінше, бүгінде бүкіл Қазақстан Республикасында «Халық заңгері» акциясы өткізілуде. Оның негізгі міндеті – тұрғындарға құқықтық көмек көрсету. Іс-шара аясында үздік заңгерлер мен адвокаттар халыққа тегін заңгерлік көмек көрсетуде. Жобаның мақсаты – құқықтық сауаттылықты арттыру және азаматтарға, әсіресе халықтың осал топтарына, аз қамтылған, көп балалы отбасыларға, жалғызбасты аналарға, мүмкіндігі шектеулі адамдарға, шағын және орта бизнес өкілдеріне, студенттерге және тағы басқа да адамдарға заң шеңберінде тегін көмек көрсету.
Айдын КӘЛІМХАН
