Ескелді ауданында Республикалық референдумға тұрғындар белсенді қатысуда. Ел болашағына қатысты маңызды саяси науқаннан тарихи Отанына оралып, бүгінде өңірдің қоғамдық өміріне араласып жүрген қандастар да тыс қалған жоқ, – деп хабарлайды 7-su.kz ақпараттық порталы.
Жалғызағаш ауылындағы №109 сайлау учаскесінде ұйымдастырылған арнайы челлендж аясында бір топ қандас азамат референдумға қатысып, өз дауыстарын берді. Шамамен 50-ге жуық тұрғын ұйымдасқан түрде дауыс беру учаскесіне келіп, азаматтық белсенділік танытты.
Қандастардың айтуынша, тарихи Отанына оралып, елдің бір бөлшегіне айналған азаматтар үшін мемлекет тағдырына қатысты маңызды шешімдерден шет қалмау – үлкен жауапкершілік.
– Қазақстан – біздің ортақ Отанымыз. Сондықтан мемлекет болашағына қатысты маңызды мәселелер шешілетін кезде әр азамат өз таңдауын жасауы тиіс. Біз де осы жауапты сәтте дауыс беріп, азаматтық борышымызды орындадық, – дейді қандастар.
Бұл бастама елге оралған азаматтардың қоғам өміріне белсенді араласып, мемлекет дамуына өз үлестерін қосуға дайын екенін айқын көрсетті.
